(حمران النواظر) **انــتي وانا.. (مذكــرات أم)**

موزة بفرح كبير: عواش خذي التلفون ناصر يبيج
عايشة اللي تولعت مصابيح الدنيا كلها في قلبها وكيانها: ناصر.. وينه هاتيه...(اخذت التلفون والدمعة تغرق عيونها) ما حاجيــــــــــك
كايد وهو يضحك براحة قلب: فديت عمررررررررررررررج سامحيني عواشي..
عواشي: ما حاجيك.. ماحاجيك لا تحاول...
كايد وهو يتسنند على الجدار والدمعة تلمع بحرارة بعيونه وهذا اللي لاحظه محمد: عواشي ارجوج ارضي علي يا خويتي تراني ما تحمل عدم رضاكم علي.. انتو نور عيوني الثنتين..ماكان قصدي انسى هديتج...
عواشي: انا ما حاجيك مب عشان هدية.. انا زعلانة عليك لاني حسيتك ناسيني
كايد وهو يحس بالحرقة في فواده وتمنى لو انه يسافر بهاللحظة ويلم اخته بحظنه ويهديها يمكن الهدية اللي اهي تتمناها: فديت عمرج عواشي انا انسى روحي وما انساج.. بس عذريني.. كنت مريض البارحة وما يا على بالي
عايشة وهي خايفة: مريض؟؟ اشمنه؟؟ اشفيك يا قلببي؟
كايد وهو يبتسم: لا بس شوية زكام.. بس الحمد لله الحين اوكيه. اني شخبارج وشخبار موزة؟
موزة وهي تكلم عايشة: خليه على السبيكر (وحطته عايشة وردت عليه) شنو ناصر؟
موزة وهي تكلمه: شفيك مريض ؟؟ اكيد ما تاكل عدل؟؟ هاي الوعد يا ناصر؟؟؟
كايد وهو يضحك: مافيني شي بس شوية زكام وراح يالغلا.. انتو شخباركم ولهت عليكم ترى
عايشة وهي تصارخ: واحنا بعد ولهنا عليك بالحيـــــــــــــــــــــل
موزة: ناصر شلون اميركا وياك؟؟ اكيد ببرد..؟؟ لاتطلع الا وانت متغطي زين سامع
كايد: ان شاااااااااء الله عمتي امري بعد
موزة: ولا تاكل اكل المطاعم وايد.. واي شي تبيه قول لي وانا ارسله لك بالطرد..
كايد: اااخ.. حتى لو برياني الخالة رحيمة؟؟ وخبزها اللي بالسمسم؟؟؟ حلفي مويز
موزة: هههههههههههههههههههههههههه سم اللي تبيه وانا اللي اييبلك اياه.. بس عطني العنوان...

سكت كايد من دهاء اخته الصغيرة.. لان موزة ما تعرف عنوان كايد ولا وين اهو يسكن بالضبط في اميــركا..

كايد وهويبتسم: جرب مرة اخرى...
موزة وهي تضحك لان اخوها مسكها ولكن ظلت الحرقة في قلبها: كانت تستحق المحاولة...
كايد وهو يغير الموضوع: عواشي شتبيني اييب لج لاني عيزت الصراحة؟
عايشة: ابي شي انيق وكشخة وحلو ومال بنات مابي صناديق خلاص لاعت جبدي منهم..
كايد: هههههههههههههههههههههه .. ولا يهمج.. انا بزهب هديتج وبنهاية الاسبوع توصلج ان شاء الله.... موازي.. شلونه... شلونه ابوي ؟؟ وعبدالله؟؟؟ و خالتي؟؟
موزة وهي تحس بشوق اخوهاالكبير لهم: كلهم مشتاقين لك .. مشتاقين بالحيل ياخوي..
كايد وهو حاس عمره مو قادر يواصل الكلام: انزين يا حلوات.. انا بخليكم الحين لان عندي شغل... اشوفكم على خير..
عواش بنبرة حزينة: متى ناصر.. متى؟؟؟


هدأت الأحوال كلها في ل حظة وتصور كايد نفسه انه يمكن يرجع الديرة مرة ثانية.. يرجع لخواته ويرجع للحب اللي يمكن يلاقيه منهم..لكنه تذكر.. انه بيرجع للوحدة ولكراهية زوجة ابوه ولحب اخوه اللي عمره ما بيلاقيه.. وبيرجع الى ذكرى تشوهه في سبيل انقاذ اخوه اللي ما بادره احد بهالتضحية الا بالنكران...

سكر عن خواته وهو يحس ان في قلبه شعله من النار كل ما تذكر فيها الماضي تزيد نيرانها وتأججها.. ظل يمشي ويا محمد بصمت وهدوء والاخير محترم سكوته وما حاول انه يتكلم وياه في أي موضوع.. وترك كايد في دائرة من احزانه العميـقة اللي بقدرته انه يخففها او يتعامل معاها بس اهو يرفض.. وما يبي يتحرك قيد انملة صوب حرية نفسه وشخصيـته...

يا ترى متى بيكون تحررك يا كايد..؟ متى؟

-----------------------------------

بتعب شديد انسدحت الجازي على السرير تحت اثر المخدر.. وزوجها يناظرها من برع غرفة العناية .. الدكتورة كانت تتكلم وياه وهو كل ما يسمع كلمة يحسها تقربه اكثر واكثر الى نهاية الفراق بينها وبين حبيبته الازلية...

ما قدر من خلال الزجاج الا انه يلاحظ جمال الجازي.. وبياض بشرتها الناصع اللي تخالط ويا الشحوب.. وويا الاحمرار اللي حايط عيونها.. وتصور يده تمسح على خدها المخملي الناعم مثل كل ما يحصل له.. ويتلمس شعرها السميك والثقيل الاسود.. ويمسك يدينها ويحس لكبر السن على بشرتها.. وشلون ان بكل نظرة منها لحتى هذي اللحظة تشتعل في قلبه شعله الحب لها...

يوم راحت عنه الدكتورة دخل على غرفتها وهو عارف انها ما بترد عليه لو كلمها لانها مخدرة... وصار كل شي معتمد عليه في اخبار البنات واعلامهم بحالة الام.. الجازي خلاص ما عادت تتحكم في شي... اهو اللي لازم يتصرف باسرع طريقة.. وهالشي خلاه يتقرب من راسها ويهمس لها باذنها وعيونه تقطر من دمع الفراق الأليم...

علي : عمري... ما حسيت اني يتيم.. قد هاللحظة..... عمري ما ظنيت اني بكون مستوحد كثر هاليوم... لان النهاية وان ما رضينا بها قربت.. وانا لازم اصلح اللي يبيله تصليح... والبنات لازم يعاونوني.. لانهم حتى وان كانو اربع.. بيكونون شوية من بعدج يالغالية... شويه...

انسدح علي بطوله ويا مرته.. لمها بيدينه.. وبكى عند جتفها مثل الطفل الصغيـر.. انهكــته ذكريات ابتسامتها الجميلة.. وصباها المثير.. وحلاوة روحها المربكة في نفس كل زوج لزوجته..

تذكر ايام حملها.. وايام الولادة اللي رافقها فيها...

تذكر ذكريات الليالي اللي قضتها وهي تتصفح في مذكراتها تحاول تلمس اسم اخوها على صفحات الدفتر.. وكانها تقدر تلمس قلبه وتلمس الشفقة منه.. الا ان الصفحات كانت احن عليها منه...

تذكر حبها العميـق له.. والتزامها ودينها وحنكتها.. وتذكر شخصيتها المتسامحة والطيبة.. المغرورة والرفيعة... الانيقة والادبية.. تذكر كل هذا.. ولكن ما قدر يتذكر رضى الجازي..

الجازي عمرها ما بترضى الا اذا كان اخوها وياها.. عمرها ما بتكمل دنياها الا اذا اخوها كان معاها.. والشي هذا لازم يصير.. ان طال الدهر ولا قصر..

كان الوقت ليل يوم يوصل علي البيت من غير مرته.. ابت نفسه عليه انها تدخل لروحه من غير حرمته.. وكان يعرف ان البنات كانو قاعدين داخل وهم بحالة من التوتر والخوف.. واكيد خلو المطعم بعهدة العمال الثانيين.. لذا ما طول اكثر .. سحب نفس طويل.. ودخل المفتتاح في الققفل ودخل...


كانت حور قاعدة على الشمال وسرور على اليمين وبدور ونور قاعدين يم بعض في حالة من التوتر والقلق.. واول ما دخل علي هبو اربعهم واقفات على ريلهم.. ينتظرون دخول امهم من بعد ابوهم.. لكن لا... كان ابوهم بروحه.. واللي اثبت لهم هذا الشي اهو الباب اللي سكره ابوهم اعلانا بانه الواصل الوحيـــد...
حور اللي سألت بصوت مرتفع بعض الشي: وينها امي؟؟؟؟ يبا وينها ماما؟؟
سرور راحت عند ابوها تشيل عنه الجاكيت اللي لابسه: يبا استريح لك شوي.. شكلك تعبان.. طلعتك انت وامي من الصبح
منعها علي من انها تفصخ هالجاكيت بانه يلمها بذرااعه ويحتفظ بها كسند يلقي عليه ثقل الهم اللي في قلبه: بنات.. قعدوا.. ابي اقول لكم شي..

قعدت نور وبدور وسرور ظلت ويا ابوها وحور على يمينة واقفة وهي متخصرة والارتجاف من الخوف مستحلها على امها...

بدور اللي تكلمت هالمرة والاه تعلو في صدرها: بابا.. وينها ماما؟؟؟

بذيج الصورة.. تكلم علي وخبر بناته بهدوء كبير الظروف للي تمر فيها امهم... نور اللي ما تفهم ثلاثة ارباع الكلام ظلت ساكتة وعيونها الواسعة تمر على ويوه خواتها... بدور كانت في حالة من الصدمة... سرور حطت يدها على ثمها.. وحور تراجعت وظلت واقفة وهي مادة يدينها على طرفها ونظرة الاستنكار في ويهها.. ويوم خلص ابوها من كلامه ركضت من الصالة وراحت لدارها وسكرت الباب بقوة...


نور ظلت قاعدة مكانها وهي تذرف دمع بسيط من دموع بدور الغزيرة الصامتة.. وسرور لمت ابوها اللي انهار جدام بناته كرجل عظيم.. وماما عابدة راحت وحظنت بدور ونور راحت عندها...

حور غمست ويهها في المخدة وهي تصرخ بقوة شديدة... بقوة يمكن لو اظهرتها اهتز البيـت..

عصرت نفسها على السرير وكانها تبي تطلع روحها من جسدها قببل المنية.. امها مصابة بالسرطان وفي حالة متأخرة.. ورقدت في العناية القصوى بالمستشفى..

يعني خلاص؟؟

ام البنات بتموت؟؟؟

من غير ما يتحقق الحلم انها تلتقي باخوها؟؟ وتظهر حقها وتبين صحة اقوالها؟؟؟

يا ترى يالجازي.. حلمج في لقاء اخوج بيتحقق؟؟؟؟ وشنو بعد هالمعرفة من البنات؟؟

هل الرجعة ممكنة؟؟؟ هل الأمل متجدد؟؟؟ هل الحب متكرر... وحاصل؟؟

ياترى.. مابعد المذكرات؟؟

نهاية الجزء الثالث

(غلا)
ننتظر التكمله يالغلا
لاعدمتك
/
\
لك الورد

سوري على التاخير ^_^

وشاكره لك متابعتك ريانة العود

دمتِ بود

الجزء الرابع

الفصــل الأول
--------------------------

الرحيــل.. آن أوانه.. وما زالت الدموع تحتفظ بنفسـها حتى أن يتحقق الأمر.. لم تجد تلك العيون إلا المدارات لتلاحقها..
أصوات الماضي كيف جرتها لتعيد-ربما- ما عانته مرة بحياتها..
ولكن.. قد تختلف المعاناة وتتحول إلى أسباب السـعادة..

آخر يوم من حياتهم في أميـركا يقضونه البنات.. وكل وحدة استفردت بنفســها وهي تكمل أمورها وتستعد بنفسيتها... وكل وحدة منهم أبت إنها تودع مكانها الوحيـد بالعالم.. أو يمكن الوطن الوحيـد.. لكن فكرة إن وطن ثاني بانتظارهم خرعهم.. يمكن هالوطن موجود ومن زمان لكن اهم ما يعرفون عنه شي... يبتعدون عنه حوالي ال16 ساعة.. وما يدرون ان جان بيصولون على سلامة ولا لاء.. لكن ظل في نفسهم الإباء والإيثار مثل ما فهمهم أبوهم..

< يا بناتي.. انتوا ما بتروحون هناك عشان توطدون علاقات او تواصلون بالارحام.. هذا واجب كل مسلم ومسلمة صح.. لكن في المقام الأول.. انتو رايحين هناك عشان امكم.. امكم اللي عاشت طول 25 سنة محرومة من نسمة هوا بلادها وديارها.. ومن شوفه احبابها اللي تخلو عنها في الوقت اللي كانت تحتاجهم فيها.. فكروا في سفرتكم على انها مهمة انسانية.. مهمة انتو تؤدونها بطيبة خاطر>

حور اكملت لوحتها وظلت تناظرها في يوم روحتها لخلف وهي تحس بطعم الحزن اللي مرت فيه اول ما بدتها.. والحين تحس بالفخر ان شي حلو طلع منها في هالبلد ... كانت تظن ان ماكو حزن يقدر يتوج جمالها مثل حزن الحب اللي انجرحت منه ولا لاعجاب اللي كانت تبادله خلف.. لكن كل هذا بين ولا شي جدام فكرة فقدانها لامها...

بذيج الليلة ماقدرت تستوعب العالم اللي اسود بعيونها.. ماقدرت تنحي ضحكة امها من اذنها وحست ان العالم اللي كان في يوم من الايام بيتهم الصغير تغير وانقلب الى ساحة كبيرة من الرمل الساخن اللي يلظي شقى القلب.. ويشجب العبرة في نفس كل انسان..

سالت دمعتها على جمال امها اللي بيذويه المرض.. وعلى لمستها اللي بتعانق التراب في القريب العاجل... تمنت لو انها ما انولدت عشان لا تجيس هالحزن على قلبها...

دخلت نسيم عليها وهي لابسة جاكيت اسود انيـق وبانطلون جينز تطلع سرتها منه.. كانت خالية من المكياج المشوه ولكن الحزن اللي في ويهها يعبر عن ألاف المعاني والمفاهيم.. وكانها اهي الثانية بتفقد ام.. لانها بالفعل بتفقد العائلة الوحيدة اللي اعتنت بها وشالتها في المسرة والمضرة.. بتخسر ابوها علي وبتخسر امها الجازي وخواتها وشقيقه روحها حور.

حور ابتسمت في ويه نسيم يوم دخلت: ما بغيتي تيين.. انتظرج من متى..
نسيم وهي تتدلى على الباب: كنت واقفة وويا سرور.. اسألها عن امج. قالت لي ان سمحوا لها المستشفى بالسفر على شرط انها تتعالج في مستشفى هناك..
حور وهي تناظر اللوحة المغطية بغطاء بلاستيكي معتم... : تصدقين نسيم..؟؟؟ بهالايام فكرة غريبة تمر في بالي اول مرة تمر
نسيم وهي تدخل اكثر وتوقفف يم لوحة قماشية خالية معلقة على منصة الرسم: شنو؟؟؟
حور والدمعة الساخنة ملحقة بارتجاف الشفة وتهجد الصوت بالبكاء: ان الموت المفاجئ احسن من انتظار الموت.. لاني بصراحة ميتــة من الخوف نسيم.. ميتة بسبب ان كل لحظة يمكن امي تموت فيها.. غير عن قبل.. قبل كان قضاء الله وقدره اهو المتحكم الرئيسي بهالشي... لكن الحين...

انفجرت حور بالبكاء للمرة الألف يمكن.. ونسيم ووياها في البكاء وتعاونها بعد.. تخفف عنها الاسى وتخفف عن نفسها... يا ترى.. هالحزن شنو راح تكون نهايته؟؟؟

لبست حور الشال اللي من جم يوم بدت تتعود انها تلبسه.. طبعا مايغطي الشعر كله لكنه بمثابة الحجاب اللي يغطي راسها.. جريب يروحون ديرة عرب ومسلمين والكل فيها متغطي بستر الله..
طلعت من البيت ويا نسيم وهي متوجهة الى خلف على حسب موعدهم.. اتصلت فيه وخبرته ان اللوحة واخيـرا زهبت.. وهو وما اخفى فرحه وحماسه.. وقرر انه يلاقيها في مرسم الكلية مثل اول مرة عطاها اياه...

ظلت حور داخل المرسم وهي حاطة الشال على جتفها وشعرها مرفوع وخصلات تنزل منه.. تتمنظر في زواياه اللي بتفتقدها وبريحة التربنتين والثنر اللي لطالما ياتها اللوعة منها.. لكن اليوم تحسها ريحة عطرة وزكية وراح تشتاق لها.. الا وبدخلة خلف عليها..

طرقاته كانت خفيفة واشبه بالخجولة.. لكن حور ما هب قلبها مثل كل مرة على وجودها وكان تصرفها عاقل وهادئ... ابتسمت في ويهه اللي اطل به وهو يسـتأذن ادخول..

خلف: MAY I?
حور باتزان وثقل: حياك..
دخل خلف وهو مبتسم ومبتهج.. ماكان حامل الجنطة اللي دوم يحملها وكان لابس طاقية بيضا صوفيه وقفاز اسود جلدي ونظارته الطبية مختفية من على ويهه ومبينته في منتهى الاناقة..: شلونج حور شخبارج
حور وهي ترفع اللوحة عن الارض يم ريلها: ابخير الله يسلمك شخبارك انت عساك طيب؟؟
خلف وهو متحمس: الحمد لله ابخير؟؟؟you have something for me?
ضحكت حور بخفة شديدة: الكريسماس يايك من وقت..
خلف: الظاهر جذي.. (بابتسامة ناصعة) ما عليه افتح..
حور: لا تستأذني اللوحة لوحتك..

اخذ خلف اللوحة وحطها على طاولة بعيدة شوي عن حور وفجج الغطا بكل هدوء مخافة انه يمكن يتلفها باي صورة من الصور.. وحور كانت تطلع الظرف البني اللي فيه الصورة من الجنطة وهي تكلمه

حور: مسامحة تأخرت فيها بس كنت ابي اتقنها والظروف بعد كانت مزدحمة علي..
خلف وهو مشغول في حل عقدة من عقد التغليف: لا ما عليج جان خذتي راحتج انا مب مستعيل ولا انتي طايرة..
غصة بلعتها حور وتلتها تنهيدة: ما اظن..
ترك خلف العقدة وناظر حور باستغراب: مافهمت عليج؟
حور وهي تسلمه الظرف اللي اخذه منها: هاذي هي الصورة اللي إئتمنتني عليها.. وكاهي سالمة مسلمة..
ما اعار الظرف أي اهتمام وكانت عيونه على ويه حور اللي لاحظ ملامح الحزن فيه: حور؟؟ علامج؟؟ فيج شي؟؟؟
حور وهي مستغربة اهتمام خلف: لا سلامتك مافيني شي...بس خلاص.. انا برجع ديرة هلي وبنترك اميـركا...
خلف وهو منصدم:for good?
حور وهي تبتسم: للأبد...
من شدة صدمة خلف قعد على الكرسي: بس مب فاهم... انتي تقريبا عشتي حياتج كلها في أميركا صح؟
حور: مب تقريبا الا كل حياتي عشتها هني حتى اننا ما سافرنا أي مكان الا داخل الولايات...
خلف: wow الحين ديرتج الحقيقية صارت بمثابة الغربة لج.. سخرية القدر
حور: سخرية القدر ... انزين فج اللوحة ابي اعرف رايك عنها..

بحماس اقل من مساعة فجها خلف وبتحكيم... لكن انبهر يوم حطت حور الإضاءة على اللوحة وبانت الصورة المرسومة في اللوحة...

حور وهي واققفة على مقربة من خلف تناظره بخوف: شرايك؟؟؟
خلف وهو مندهش: amazing
حور تنهدت برضا وابتعدت شوي لعند جنطتها تجمع اغراضها: الحمد لله.. كنت شايلة هم انها يمكن ما تعجبك..
وقف خلف بدل ما كان قاعد: حور اللوحة حلوة وبمنتهى الروعة... مب كاملة الا بكمال وجهه الكريم لكن... انتي تتمتعين بموهبة حرام لو تنفذ..
حور وهي تبتسم: عاد هالشي راجع لحكمة رب العالمين...
خلف: انا اتكلم لج من جد يا حور.. موهبتك... وان كنت مافهم في الرسم الا انها ممتازة وتحتاج الى صقل شديد عشان تكونين من مبدعي هالزمان..
حور وهي خجلانة من الاطراء: عاد مب من هالزمان.. يمكن من معارفك او معارفي أي...
خلف: اتوقع لج مستقبل عريق في مجال الفنون يا حور..
حور وهي تناظره بامتنان.:... شكرا خلف.. اشكرك على هالتوقع الجميل...
خلف وهو يفرك يدينه: انتي ياحور بنت ولا كل البنات.. وأنا افتخر في كوني من معارفج وانتي من معارفي..
حور وهي تقاوم جملة في نفسها.. لكن ماردها وقالتها: وانا افتخر ان لي بهالغربة.. صاحب و.. اخ مثلك يا خلف..


ابتسامة غريبة ظهرت على ويه خلف.. وكانها ابتسامة تمثل خوف متراجع في نفسه إلى الطمأنينة.. وحست حور ان خلف يمكن حس لمشاعر معينه من طرفها تجاهه.. ولا شي من هالقبيل.. وشلون ما يحس وهي من اول ماعرفته لحد اخر مقابلة بيناتهم وهي ترميه بنظرات تعبر عن ارتباكها وخجلها واعجابها به..

حور وهي تلم اغراضها وترفع الشال على راسها وتغطي شعرها الا من قذله انقذفت بجمال على جبينها العريض: يالله.. انا اخليك ..والظاهر اني لفترة طويلة ما راح اشوفك فيها...لذا تحمل بروحك واتمنى لك كل السعادة مع زوجتك.. وصل لها سلامي..
خلف وهو يبتسم بحبور: حور.. اتمنى منج تعرفين شي واحد...
حور وهي واقفة عند الباب:.. اللي اهو؟
خلف: لو كانت ظروفنا مختلـفة.. لو كانت الأمور مختـلفة.. لو كنت انا واحد غير وانتي وحدة غيــر.. من يدري... يمكن تلاقت اقدارنا... لانج بنت ولا كل البنات وانا اتمنى لج كل الخيـر..


ظلت واقفة حور على الباب وهي تناظر خلف بامتنان كبيـر.. وشكر عظيم لهالانسان اللي حسسها بانها مرغوبة ومب مرفوضة مثل ما كنت تتصور.. الا ان الظروف او يمكن القدر جمعهم بهالطريقة عشان ان في قدرها او نصيبها شي مختلف تمام الاختلاف عن خلف..


طلعت من الكلية وهي تحس بانها فراشة تطير في العالم.. ريحة الصبغ طبعت فيها مثل العود العريق بعنق الحرمة المتزينة.. وتمت تمشي في شوارع نيويورك المؤدية الى السابواي وكانها خطوط يدها اللي تعرفها.. قعدت في السابواي واهي تذكر نسيم وسوالفها داخل هالمحطات وشكثر نالت منها مقالب ولقت منها ناس تعرفت عليهم يمكن للحظات الا انهم صاروا معرفة ومقربين لها..


طلعت من السابواي متوجهة الى الكوفي شوب.. ومرت على الدرب اللي طاحت فيه ذيج المرة يوم تنصدم في الشخص.. وتذكرت سلسلتها اللي باقها وانقهرت من الزين.. لان قيمه هالسلسلة ارتفعت في نفس حور لكونها من معطيات امها الغالية.. وتمنت لو انها تلاقيه عشان تعطيه علقة ساخنة من اللي في خاطرها..