(حمران النواظر) **انــتي وانا.. (مذكــرات أم)**

وقفت الطيارة..

ساد الهدوء اخيــرا..

كايد ما صدق ان الطيارة وقفت..

كان وده لو انه يروح لكبينه الطيار ويقول له فر الطيارة ورد بنا الى هيثرو او أي جهنم الا هالديرة.. لكن الجمود كان حابس ريله والدم ما يمشي في عروقه وويهه مبيض من شدة التوتر.. محمد فتح حزام السلامة تحت ارشادات مظيفة الطيران.. ناظر كايد اللي كان قاعد وكأنه تمثال لرمسيس الثاني.. شخر بسخريه عليه وقام من مكانه وفتح كابينه الجنطه الخفيفة اللي يحملها.. لبس جاكيته اللي كان مطوي داخل جنطه خاصة بالبدلات ولف اللفافة الكشميرية على رقبته وظل ينتظر كايد وهو متخصر..

محمد: كايد خلاص احنا وصلنا يلا قوم الحين

لكن كايد بعده ساكت وهو مفتح ثمه ويتنفس منه

محمد بقله صبر: you act like a child لا تصير مثل اليهال تخاف من الدنيا..

كايد وهو يسحب نفس طويل .. يفتح حزام السلامة ويقوم على ريله.. صج ان دوره غياب النفس عن مخه داهمته لانه حبس النفس مدة طويـلة عن رئته من شدة التوتر اللي فيه.. فتح الكابينة اللي فتحها محمد من شوي وطلع منها الجنطه الخفيفة اللي حاملها.. استحسن محمد ثبات كايد الزائف وتم يمشي جدامه وهو يظنه وراه.. التفت عشان يتأكد لقى كايد واقف مكانه وعلى عيونه نظرة خوف قوية...

محمد تقرب منه بقله صبر بينت بنبرة صوته: now what? (الحين شنو)
كايد وهو يناظر محمد وكان يشوفه لاول مرة: لو كانت هالسفرة غلط؟؟ لو كانوا هلي مب موجودين في الديرة.. انا مادري انهم موجودين ولا مسافرين.. مرت ابوي ما تقر بالديرة.. وكل يوم لها سفرة.. (ابتهج كايد مرة وحدة) خلنا نقص تذاكر نرجع فيها نيويورك وبعد ما يرجعون من السفر احنا نيي لهم مرة ثانية

ابتسم محمد في ويهه وسحبه بطريقة مفاجئة من يده الى برع الكابينه.. كايد اللي ما لقى الا الطواعية ورى محمد حس بالتوتر يمغص بطنه

محمد وهو يتكلم بهدوء وعلى ويهه ابتسامة سخرية: كل شي يحتاج الى قبضة ادارية.. حتى الريال اللي عمره 27 سنة.. ماصدق انك تخاف... ومن من بعد؟؟ من أهلك.. ناس واحبابك واللي من لحمك ودمك؟؟ اذا اهلك يخرعون فشبتقول عن عمتــي بس...؟؟؟

ظل كايد يمشي من غير حواس وهو ما يسمع باذنه الا دقات قلبه العنيفة تتضارب وتوتره اللي مغمم عيونه من النظر.. محمد اهتم بكل شي وسير امور رجعتهم في المطار بكل سلاسة.. توجه الى الجنطات عشان يستلمهم وظل كايد واقف بوسط القاعة يناظر الناس وهي فرحانة لانها راجعة من السفر.. تحظن اهلها واحبابها وتضحك بهرج ومرج معلنة الشوق العظيم اللي مروا فيه طول ما كانو غايبين عنهم.. الكل كان له احد يستقبله الا هو.. وهو ولو بغى جان موزة وعايشة حضروا له واستقبلوه ويمكن سوو فظيحة فرح لانه وصل للديرة..

وصل له محمد وهو معاه الجناط على المحمل وناظره بجدية: are you ready??

كان كايد عاقد حواجبه بازدراء ورفض شديدين مثل اليهال لكنه هز راسه بالايجاب لمحمد اللي قاده وهو يدفع الجاري بروحه... ظلت عيون كايد تلاحق ويوه الناس المختلفة في المطار.. كان الوقت ليل فما بانت له أي معالم من ديرته السابقة.. حاول انه يلتقط منظر او مشهد لكنه ماقدر فانتظر الى ان يطلع من بوابة المطار...

وققف على بوابة المطار ورشحته قطرات من المطر الخفيف اللي كان ينزل بذيج اللحظة.. حس برووح تدخل داخل جسمه وسكر عيونه من شدة اصطدامها به.. فتح عيونه وهو يحس ببرودة القطرات الخفيفة اللي تتهادى على ويهه بحنان وحساسية.. شاف محمد متوجه الى احد التاكسيات الفاخرة الواقفة وأشر لكايد عشان يلحقه.. لبس كايد الطاقية على راسه وكأنه يبي يتخفى عن لا احد يعرفه ومحمد من زمان دخل السيارة...

يوم دخل كايد التاكسي عطى العنوان لراعيه من غير ما يطلب منه محمد.. وتحرك السايق من مكانه باتجاه هذاك العنوان

كايد وهو يتكلم مع محمد وهو يهز راسه: قول لي اني مب غلطان برجعتي!! قول لي ان اللي اسويه اهو الصح...
محمد وهو يطمن كايد بابتسامة اخوية: علامك يا كايد جنك حمامة مبللة.. انت اللي تسويه صح يا كايد وخطوتك صحيحة.. لازم ترجع بيتك ولاهلك لانك لمتى بتكون مقطوع عنهم.. ومن يدري يمكن من بعد هالرجعة انت تتم على اتصال تام وياهم
كايد وهو يحس بصعوبة اللي يقوله محمد: انت ما تعرف فاطمة يا محمد من جذي تقول هالكلام... بعدين انا ما اخطط اني ارد ارجع لهم.. انا مجرد ياي احتراما لمنزلة ابوي اللي يستاهل انه يدري ان ولده مقرر يتزوج.. وبس..
محمد وهو يبتسم ويناظر العالم من الدريشة: كلام قوي.. بس من من صادر؟؟
كايد وهو يأكد له بثقة: صدقني يا محمد... هذا كلام قوي من قلب قوي.. انا مسافر بس عشان خاطر حياة وخاطر ابوي اللي اهم الاثنين يستاهلون... والا انا مالي ايي نية استرجع صلاة او علاقات او روابط.. (وعلى طول تذكر العمة اللي ر جعت وهو ينفي وجودها من خياله ويناظر المنظر من برع الدريشة) انا مب مخطط ولا مهتم اني ارجع لاحد... ولا أحد..

من غير ما يعرف كايد انه بنفس اللحظة اللي كان فيها موصل الى سيارة التاكسي اللي تحركت سيارة عبدالله كانت بعد متحركة وياه في نفس الوقت من بعد ما وصل امه الى المطار... راحت فاطمة لداخل من بعد ما ودعت ولدها اللي كان متظايق لخبرر سفر امه المفاجئ.. لكن مو مثل ظيجه للمطر اللي هطل عليهم والظاهر ما راح يتوقف رذاذه لطول الليل.. معناته انه الليلة ما بيقدر يروح الاسطبل وما بيشوف بدور ولا بيدربها على الفرس مثل ما هو يتمنى...

عبدالله وهو يكلم نفسه ويســرع على الدرب الحرر متجاوز التاكسي اللي يحمل اخوه: اللي حظه دمار يتم حظه دمار قام ولاقعد.. (يناظر السما وهو يتمنى) ياليت هالمطر يوقف بس.. ياليت..

لكن تم عبدالله يسوق سيارته لبيتهم... وظل التاكسي يقود كايد الى بيت ابوه...

الفصــــل الثاني

-0-0-0-0-

لطيــفة اللي كانت في بيت ام شاهين ويا عذرا يسولفون في سوالفهم المعتادة ما قدرت تخبي ظيــجها الواضح.. وبينما عذرا تتناجر ويا اختها سبيجة على محطة التلفزيون اللي يبون يطالعهونها تنهدت بعمق وبمرووورة وكأن حمل الدنيا كله على قلبها..

سبيجة وهي تتصارع على الريموت الكنترول ويا عذرا: عويذروو شوفي خلي عنج العناد انتي من متى تطالعين التلفزيون
عذرا وشياطين جمالها تحوم على راسها: من اليوم وخلي عنج العناد سبجووه لا والله اناديلج ابوي..
سبيجة وهي تناحس وتبجي مثل اليهال: عذروووه يا الكريهة عن النرفزة قومي روحي شوفي بنت خالتج اكيد متمللة بدونج ..
عذرا وهي تلتفت للطيفة المكتئبة: لطوف انتي تبيني اقعد وياج؟
لطيفة بقلة اهتمام: عادي عذروو خذي راحتج
عذرا وهي تناظر سبيجة العاجزة بحاجب مرفوع: شفتي؟؟ والحين خلي الرموت لا كسره على راسج
بعد صراع طويل افلتت سبيجة عن الرموت مرة وحدة واللي خلى من عذرا تتعثر وشوي تطيح على ظهرها: خذي التلفزيون بروح اطالع تحت بالصالة.. وان ما خلاني شويهن بسبابج والله بييج هني مرة ثانية..

نزلت سبيجة وراحت عذرا وصفقت الباب بعصبية..

عذرا وهي تقعد من بعد ما رمت بالريموت على الكرسي الثاني: الياهل.. عبالها علي انا.. اوووف متى افتك من هالبيت ومن اللوعة سبجوه..
لطيــفة وهي تتكلم بخاطر مكدر: انتي وغيرج وآلاف الأحلام
عذرا انتبهت لها بينما يدها في شعرها الاثيري: علامج اتحردنين؟؟
لطيـفة وهي تتثاوب بتعب: ولا شي..
عذرا وهي تحط ريل على الثانية وتجابل لطيــفة بقلة صبر: لطوف تحجي احسن لج..
فكرت بالمماطلة لكنها صرحت باللي في خاطرها وبان كدرها: هالحالة اللي احنا نعيشها...
عذرا وهي تستند وكانها ملكة: أي حالة؟؟؟
لطيــفة بقلة صبر: هذي حالة العزوبية.. لمتى ؟؟؟ بصراحة انا كل يوم يتقدم لي واحد وامي بكل سهولة ترفضهم...
عذرا وهي ترتب نفسها بقلة اهتمام: هاي اللي هامج؟
لطيـفة باهتمام شديد: وليش انتي ما يهمج؟؟؟ ترى العمر جاري يا عذرا واذا تمينا وايد فبيوت اهلنا بنتم طول عمرنا..
عذرا بغير اكتراث وهي تناظر اظافرها المدرمة بعناية: طالما انا بعز وكرامة وبعدني بشبابي ليش اهتم... طنش تعش
لطيــفة وهي تبتعد للزاوية الثانية من الكرسي الوثيــر العريض: تكلمي عن نفسج.. انا وحدة متظايقة بالحيل من نفسي.. والله نعوووم هذي اصغر عيالنا تنخطب ولا يمكن توافق وتتزوج واحنا اللي اكبر منها بعدنا في بيوت ابونا (اكتسح الخوف معالم ويهها) مابي اعنس والله..
ضحكت عليها عذرا بسخف: والله انج سخيفة ومخج سطحي؟؟؟ شلي قاصرج انتي بالضبط اللي تبين تكملينه بالزواج؟؟؟
لطيــفة بدفاع: شلي ناقصني؟؟ ناقصني ريال يشيلني واشيله..
عذرا ترد عليها بسرعة: عندج اخوج وابوج
لطيفة وهي تزيد: ناقصني حب وحنان انا محتاجتهم
عذرا بقلة اهتمام :الله يخلي خالتي ام سيف
لطيــفة وهي توقف بعصبية: ناقصني ريال يحبني ويعشقني ويغرم فيني مثل المينون... وانا بالمثل يا عذرا...
عذرا وهي تناظرها بازدراء: ما تقترحين علي انج تبين تكونين علاقات مثل هالبنات الخايسات؟؟؟
لطيــفة وهي تتخصر: مب كل البنات اللي يكونون علاقات خايسات.. بعضهم يطلعون من هالعلاقات بشي ثابت.. مثل الزواج!!
عذرا والاستنكار والغضب على ويهها: انتي اكيد ينيتي؟؟؟ من صجج هالكلام؟؟ ولا يالسة تلعبين علي..

التزمت لطيـفة الصمت وملامح اليأس على ويهها.. وزاد هالشعور الخوف في نفس عذرا الي سحبت لطيفة من يدها بقوة وهي تنهرها

عذرا: لطوووف يا ويلج ان اللي في بالي صح.. والله لاعلم عليج سيف اخليه يقطع راسج؟
لطيـفة وهي ترفع يدها عن عذرا: تقولين لسيف شنو؟؟؟ اني ابي اكون علاقة ويا انسان؟؟ اني احب انسان؟؟ وانا احب انسان ياعذرا انتي تعرفينه زين ما زين...
عذرا وهي مستغربة: انا اعرفه؟؟ من اهو..
لطيـفة وهي تقعد بعجز على الكرسي والدمعة تكسر ملامح ويهها الجميــل: عبدالله ولد خالتي فاطمة.. (وهي تناظر عذرا بكدر مدلل) من غيره يعني..

عذرا هدى قلبها من بعد المخاوف.. لان مهما كانت لطيــفة خبلة فمب معناته انها تتخبل وتروح تتعرف على واحد من هالشباب الصايع

تنهدت وقعدت على الكرسي بهدوء وهي تمسد قلبها: الحمد لله ان اللي في بالي طلع مب صح... (وردت نبرة التهديد بصوتها) لانه والله يا لطووف قبل لا يصير شي انا اللي اذبحج... مب احنا بنات العوايل اللي نميــل لهالدرب الوقح ..
لطيــفة وهي تأشر بيدها بعلامة الملل: روحي زين.. درب وقح قالت لي.. ثلاثة ارباع بنات العالم كلهم يحبون ويكلمون واحد في التلفون
عذرا بكبرياء غبي: وكلهم غبيات اذا ظنوا ان هالصبيان يحترمونهم
لطيــفة تناظر عذرا بكبرياء مماثل: اصابع يدج مب سوى... (وهي تفكر وتفرك اصابعها بنعومة) بعضهم يحترمونهم ويقدرونهم اشد التقدير.. واذا شاف فيها المعدن الخالص يروح يخطبها من اهلها بعز وكرامة ويتزوجها ويعيش ووياها حياة هنية..
عذرا بعدم اهتمام تقلبب عيونها دلالة على ان هالكلام ما يدش مخها: بلا بلا بلا... أي قصة من قصص احلام ولا عبير اللي قارية فيها هالشي؟؟؟ حبيبتي احنا في ديرتنا ماكو ريال يحترم حرمة لان معدنها خالص.. شباب هالايام ما يبون الا شي واحد من البنية والله يبعدنا عنهم..
لطيــفة وهي تغير الموضوع: خلينا انزين من شباب العالم.. خلينا في شباب عايلتنا.. يعني انتي لمتى بتنطرج امج لهالناصر ذي اللي ما اذكر حتى ويهه...؟؟؟؟ ولمتى انا بنتظر عبدالله اللي من يدري اني بمكان اهو فيه شرد منه؟؟ وكل ما يا خطبج انتي امير او انا رجل اعمال امهاتنا رفضوا لحجة اننا..
كملت عليها عذرا باقتناع: مب حجة وانما حقيقة اننا محيرات لرياييل من عوايلنا.. (تنهدت بعمق وكأنها تبي تلقي محاظرة طويلة عريضة) شوفي حبيبتي لطوف.. انا وحدة مني ما عرف هالناصر ولا اكترث لمن يكون.. انا اللي يهمني لو بأخر الزمان انه اييي ويتزوجني ويعيشني في النعيم اللي انا ابيه ومحتاجته.. وابوه مستحيــل يخليه يسوي شي خلاف هالشي.. اما عن عبدالله فهو بعده ياهل (ناظرت لطيـفة اللي شخرت بسخرية فردت عليها بصرامة) هم انتي ياهل لطفووو.. انتي يا حظي كملي الكلية.. صارت لج ثلاث سنين وانتي بعدج ما تخرجتي..
لطيــفة بيأس وعجز: انا مابي اظل طول عمري انتظر عبدالله... مع اني احبه واموت فيه واستخف اذا شفته بمجلة الفروسية.. (بدلال وكدر واضح) الا انه وايد معور قلبي..
عذرا وهي تسخر منها بشدة وحاجبها مرفوع: هذي هي غلطتج اللي غلطتيها.. انتي حبيتي هالعبدالله.. ما صرتي شاطرة مثلي.. (قامت من مكانها وكأنها فرس) انا لا حبيت هالناصر ولا اقظي يومي بالتفكير فيه.. ولا يهمني ان جان هو فكر فيني ولا لاء.. اللي يهمني اهووو انه اذا يااا انا لازم اجهز لزواجي اللي الكل بيتكلم عنه.. وللمنصب الاجتماعي اللي بلاقيه يوم الي اصير فيه جنه فاطمة بنت ياسر .. (بازدراء واشمئزاز) والا هالناصر ما بيأخر ولا بيجدم علي بخطوة .. (ناظرت لطيــفة وكأنها وصلت الى نتيجة لكلامها وياها) فهمتي..

طبعا لاااا... لطيـفة ما فهمت هالكلام الفاشل اللي قالته عذرا لان طبيعة لطيـفة – على الرغم من تفاهه تفكيرها- عاطفية جدا وحالمية ورومانسية لابعد الحدود.. وحبت عبدالله حتى بنفوره منها.. ومصممة على فكره انها تتم على حبه لكن اهي مب بنفس غباء وتملكية حياة.. فهي في بالها اذا ياها احد ثاني مستعد انه يكون المضحي والحبيب على الفرس الابيض بدل عبدالله فهي بتوافق- لو كان فيها انها توافق- من غير أي تفكير ثاني بهالعبدالله.. لكن دام ان مصيرها محكور في هالشخص فهي لازم تنتظر وتستحمل وتصبر..

وبعد.. هفت لطيــفة بقهر على هالفكرة... فا الله يعينج يا لطيــفة

وصل عبدالله للبيت وركن السيارة داخل الركن اللي يصير بعد الحديقة الفخمة والملكية اللي بالمدخل .. فبيتهم الكبير عبارة عن ارض واسعة جدا رئيسية فيها بركه صغيرة لسمج الزينة والحشيش الاخضر يغطي المساحة تقريبا كلها.. وفي حوض من الازهار ووالورد والقعدة الخيالية واشجار الياسمين الي تتسلق على الكرسي الحديدي الابيض فيها ويمها تصير استراحة السيارات (نسميها الكاراج او الطبيــلة) ..

تم دقايق داخل السيارة وهو يراقب المطر اللي زادت شدته شووووي وصار نقر على الارض اذا مشيت تحته.. لكنه بعد جميـل ومثير للراحة والمشاعر في قلب عبدالله.. لاحظ الكاراج لقاه خالي من سيارة ابوه وسيارة السايق الخاص بامه موجوده ومغطية بالطربال.. امه!! صج انها انسانة عايشة حياتها بفلته.. وكأنها ريال.. ابتسم بسخرية وطلع من السيارة وهو يلبس الكاب على راسه ومستعد لليلة وحدة بالبيت..

مشى وهو مستمتع تحت المطر بخفة يبتسم لجمال الشعور اللي بداخله .. تابع مشيه الى ان تخطى الحوض وراح لعند الباب يفتحه... توه بيدخل البيت الا وسيارة تاكسي توقف عند الباب الرئيسي البعيــد.. ناظر عبدالله التاكسي باستغراب من اللي ممكن اييهم بهالحزة وبتاكسي.. لا يكون بس امه ناسية شي في البيت وردت بتاكسيات المطار.. بس ما يصير اهي عندها جوالها واكيد بتتصل اذا صار لها شي..

مشى عبدالله لعند كابينة الحارس عشان يفتح الباب الحديدي وخفف من مشية يوم ريال طويل يطلع من السيارة وراسه كان مغطى بطاقية حمرا وشعره شوي طويــل.. استغرب عبدالله من هالشخص اللي يايهم بهالحزة ولكن دق قلبه مثل طبول الحرب اللي تعلن شي... تقرب عبدالله شوي وما قدر يميز الشخص من الظلاااام والمطر اللي قوت زخاته مرة وحدة..

تم الريال واقف وكأنه مجمد على الشارع وعبدالله ما عبى بالمطر اللي بلله لحد عظمه وتم واقف متخوف من الواققف..

بعد ما نفذ صبره عبدالله تجدم وهو يدور على شي في ويه هالريال: من انت؟؟؟

ما رد عليه الشخص لحد ما تقرب عبدالله للبوابة الحديدية وهو مرتعب وخايف..

عبدالله وهو يناظر الشخص وكأنه بدى يتعرف عليه ..: من انت .. ؟؟ قرب هني؟؟

قرب الشخص وشوي شوي بقربه سطعت عليه انوار المصابيح المثبته عند البوابة الرئيسية وبانت ملامحه تدريجيا لحد ما ظهر ويهه كامل..

وقفف عبدالله بمسافة قدمين بعد عن البوابة وكايد اللي صار قريب منها مسك الحدايد وهو يناظر عبدالله بدهشة:... هذا انا عبدالله.... ناصر..

رسميــا عبدالله كان ميت تحت المطر ولكن انفاسه شلون صدرت منه هذا اللي انا ما اعرفه.. كايد ظل واقف وهو محتار ما بين الابتسام على عبدالله اللي غادره كايد صبي ورجع له ريال ولا التجهم لانه يناظره وكأنه دخيــل مثل ما كان يعامله طول حياته..

كايد وهو يحس بالبرد ينخر عظامه والماي يتخلل ملابسه القطنية: توني ياي من.. المطار... توني واصل من... اميــركا.. وو.. (غاب كلامه وحس بالاحراج الشديد اللي حمد الله على ظلام الليل عن لا يكشفه في ويه عبدالله.. وماقدر الا انه ينطق بهالشي ) ابوي موجود؟؟؟

اوتعى عبدالله لروحه.. وحس ان المطر مثل السهم ينرش بويهه.. ما اهتم.. وراح بحركة سريعة الى داخل كابينة الحارس وضغط زر البوابة وهو يحس بالاعاصير تمر بداخله..

انفتح الباب الكبيــر الرفيعة وما عاد هناك أي حاجز بين كايد وعبدالله..

وتكلم عبدالله وهو يكبت الاحساسيس بداخله ويرد بهدوء: ابوي في بيت المزرعة ويا موزة وعايشة... والحين يردون.. (سكت وحس ان الطنين يخرق اذنه والمطر مبلل روحه ) حياك داخل عن المطر..
كايد وهو يكبت رغبة في انه يعانق اخ ما يتمنى وجوده بهاللحظة: معاي رفيجي..
عبدالله وهو يقرر شي: نفتح له الميلــس عيل.. حياك.. (تهجد صوته) ادخل..

التف عبدالله عن كايد وقت اللي دمعت فيه عينه ولكن الدمعة ضاعت مع قطرات المطر القوية اللي غطت ويهه بالكامل.. تم يمشي وصدره المرتفع بشدة وحزن يشق التيارات الهوائية اللي دارت بلحظة.. وصل لعند باب الميــلس الخارجي وفتـــحه وهو ويسحب انفاااس عديدة ويمسح ويهه.. فتح الليـــت وركض لداخل البيت يشوف احد الخدم عشان يجهزون شي للظيوف.. كان مخه يشتغل بطريــقة آلية وما كان يفكر باي شي الا بالواجب في ذيج اللحظة.. اللي ما عرفه عن روحه اهو ان لون ويهه شرد منه وحل مكانه شبح ابيض يتصرف بهالعملية..

وقف عند المطبخ وين ما الخادمة قاعدة: Prepare Some Relish And Appetizer We Have Guests In The Men Saloon
(جهزي الفوالة والمقبلات عندنا ظيوف في ميلس الرياييل)
الخادمة وهي تستفسر وحالة عبدالله مخرعتها: Is Mama Mooza Here??
عبدالله وهو يتنفس بصعوبة ويتخيل موقف موزة وعايشة اذا عرفوا ان كايد رجع: No… Not Yet.. Prepare Everything And Bring It To The Saloon Okay??
(لا لا للحين ما يات.. جهزي كل شي وييبيه للصالون اوكيه)
الخادمة وهي تهم في شغلها: Okay Baba Abdulla

طلع عبدالله من المطبخ ولكن ضربات قلبه المتسارعة حثته على الوقوف شوي.. ويوم سحب نفس قوي كبت صرخة ألم بداخله ومشى على طول الصالة وطلع من البيت .. وشاف التاكسي يوقف سيارته عند الحوض اللي مخصص يمه وقوف السيارات القادمة.. خف المطر بصورة كبيــرة ولا كأنه كان يزخ بشدة قبل لحظات.. وطلع من التاكسي واحد طوله مقارب الى ناصر وشكله عربي لكن اسلوبه كان اجنبي.. ناصر كان اهدأ من المعتاد او يمكن بعده في حالة صدمة وما وعى منها..

كايد وهو يناظر عبدالله بتأثر شديد ونبرته جشّه وهادئة: ما تدري متى ابوي والبنات بيردون
عبدالله هز راسه بنفي وبسرعة وكانه ياهل ما يدري ليش اهو ضايع جذي: بس ماظن يتأخرون... حياكم الميــلس..

ابتسم محمد في ويه عبدالله اللي كان متجهم وصلب الملامح وطالع ويه كايد لقاه بنفس الحالة وكأن ميت عندهم احد..

تقرب محمد من كايد قببل لا يدخل الميلس: شصاير؟؟
كايد وهو يرد عليه بابتسامة: ما صاير شي.. حياك داخل..

دخلوا الى الميــلس الكبير العريض بفخامته الملكية وبتنجيده الفاخر.. كان اللونين الازرق الملكي المخملي والذهبي مسيــطر على الجو مع التحف والا ضافات الديكورية تزيد من اناقته وكياسته وما قدر محمد الا انه يستعجب من اناقة المكان وممن حجم بيت كايد وجال في فكره ثراء كايد اللي لوين يمتد؟؟؟

كايد وهو يعرف محمد على عبدالله اللي كان واقف وهو موطي راسه للارض: محمد.. هذا عبدالله.. (بلع ريجه المر بمرارة) اخوي الاصغر مني ... وعبدالله هذا خوي عمري محمد بن الفيــصل..
محمد وهو يمد يد ودوده الى عبدالله: اهلين عبدالله.. جيف حالك اخوي عساك طيب..
عبدالله بنفس الكياسة رد على محمد: يطيب حالك حمد لله على السلامة..
محمد وهو يبتسم بحفاوة وينقل نظرة بين الاثنين في محاولة لكشف التشابه: يسلم غاليك ومغليك... شلون الأهل والوالد عساهم طيبين؟؟؟
عبدالله بنفس الهدوء والكياسة رد على محمد: ابخير وصحة وسلامة الله يحفظك...

ابتسم محمد ونقل نظره بين كايد وبين عبدالله ولقى انهم لحد هاللحظة ما تصافحوا من اول ما شافوا بعض ووقفوا بتوتر وكل واحد حاط يده في مخباااته..

الا ووصوت كايد مرة وحدة يطلع بأدب فظيــع وكأنه في مكان غريب:... مادري ان جان...اقدر اغير هدومي غصنا في الماي مساااع...
عبدالله بآلية: افا عليك.. دارك بعدها مفتوحة..
كايد بتواضع: لا ما يحتاج بس ابي الحمام عزك الله.. ابدل فيهم هدومي
عبدالله وهو يرد باسلوب متوقع منه: لا شدعوة غرفتك بعدها على حالها.. فوق...
ابتسم كايد في ويه عبدالله اللي كل ثانية تلزق عيونه يا بالارض يا بالحاضرين...: تسلم.. (وجه عيونه الى محمد) تبي تغير ثيابك محمد؟
محمد اللي كان جاف بنسبة 90% : لا لا انا ما بللت ثيابي.. انتو اللي ووقفتوا بالمطر.. روحو وانا بتم هني ولا تتأخرون علي.
عبدالله وهو يراضي محمد: لا خل ناصر يروح (استغرب محمد اسم ناصر وناظر كايد اللي بين له بعيونه انه يمشي الأسم) وانا اتم وياك الحين.. (الا والخادمة تدخل وهي تجر عربة الفوالة) COME HERE JONA
محمد وهو منحرج ويناظر عبدالله بابتسامة: ماله داعي يا معود تراني واحدمنكم
قاطعه عبدالله وهو يبتسم ويمد يده وكانه يسوي الموضوع: لا شدعوة انتو رادين من سفر واكيـد يواعة وتعابة..
كايد وهو يحمل جنطته اللي طلعها من التاكسي وحملها وياه لداخل الميلس:.. عن اذنكم انا اروح اجهز ثيابي (مسك ذراع محمد قبل لا يروح ) make your self at home (ابتسم وطلع)

مشى كايد لبرع الميلس وقبل لا يتجدم اكثر وقف بالصالة وهو يناظر المكان اللي تغير بشكل كبيــر من ناحية الديكور فبدى وكأنه قطعة من الجنة... على طول تكدر خاطره وتمنى لو انه ما رجع .. يمكن ترتيب المكان بهيئة الجنة دلالة على الحالة النفسية اللي كان يعيشها اهل البيت قبل لا ايوون..

ركب الدري وهو حافظ دربه وحافظ جزئه البعيد من البيت اللي حتى لراحته خله له ابوه مخرج من الغرفة الكبيــرة عن طريق الشرفة العريضة الضخمة اللي تطلعه على الحديقة الخلفية بدرج من الطوب الأحمر على هيئة الحلزون الملتزق بالجدار وكأنه منفذ...

دخل داره وهو يحس باحساس العزلة ومثل الغريب وقف بوسطها.. وهز راسه وسط ابتسامة حزينة تشبع قلب ناظرها بالألم واللوعة..

كايد وهو يهمس لنفسه بصوت اشبه بالباكي: انت ما تنتمي لهم... ما تنتمي لهم.. ليش رجعت ليش؟؟؟

طلت بدور من الشرفة وشافت قطرات المطر تتهادى في ردى الليل وواضحة للعيان جدام العين... حست بالهدوء النفسي والراحة العظيمة اللي في قلبها لانها لاول مرة من وصلوا الى هالبلد اجتمعوا كلهم كعائلة تحت سقف بيت عرفوا من فترة انه ملك امهم.. يعني ملكهم.. فيعني اهم في بيتهم... ابتسمت من خاطرها على هالفكرة والشعور الدافئ اللي يمر فيها.. ومرة وحدة سمعت صهيـــل منخفض صادر من الاسطبل البعيد وخطر على بالها عبدالله اللي مختفي طول هالليالي..

يمكن يا الليلة على موعد انه يدربني؟؟؟

بس اهو مب لهالدرجة من الغباء.. شلون يدربني والجو بارد جذي والمطر يزخ.. ولكن اهو اهبل كفاية انه يفكر بارتكاب هالحماقة..

وياها صوت حور المرح في صماخها: الليل يا ليــلى يعاتبني.. ويقول لي سلــم على ليــللى (تنهدت بدور بظيـــج عشان تبعد حور لكنها استمرت بالسخرية والمرح) والا اقول بدور.؟؟؟
بدور وهي رافعة حاجبها وابتسامة السخرية على ثمها: get lost
حور وهي تضحك: ouch (اوووج) عورني كلامج...
بدور وهي ترفع حواجبها بانتصار: زييين
حور وهي ترد عليها بحاجب مرفوع بكبرياء: بس انا قطوة ميااااو.. بتسعة الاف رووح
بدور وهي تبتسم بسخرية: قطوة نووية؟؟
حور وهي تناظرها باستنكار: نووية؟؟؟ لااا.. قطوة الجيــل اليديد والحاملة لرووح السلام
بدور وهي تتصنع الفهم: اوووووووه.. نسيت انج فنانة حالمة ولج من الخرابيط الهيبية؟؟
حور وهي تاشر في ويه بدور: جبي لا افضح سالفة هالروبية اللي معلقتها على يدج!!
بدور وهي ترتبك شوي ولكن تتمالك روحها: شتبين انتي ؟؟ صج انج قطوة
حور وهي تهمس: ب9 آلاف روووح (ضحكت في ويه بدور)
بدور وهي ترجع بعيونها الى الاسطبل البعيد..: مليــقة
مااهتمت حور لملاحظة بدور الاخيرة ولكنها اهتمت بملاحظة ثانية: صج بدور؟؟ شسالفة العملة اللي في يدج؟؟
بدور وهي تكلمها من غير تلتفت لها وبخار البرودة يغطي جزاز الشرفة: مب شؤونج؟؟
حور وهي تمسك جتف اختها بحماس: well, well, well من اللي كان يظن؟؟ بدور ولها هدية من ... (استنكرت حور بمرح وسخرية شديدة) من صبي يمكن معاذ الله؟؟
بدور وهي تلتفت لها وهي تتنهد بقلة الصبر: جم ادفع لج عشان تقلبين ويهج؟
حور ووهي تضحك بحماس: يلا بدوووور... اعترفي لي.. اخرجي ما في نفسك الى روووووووح الفن اختك.. (وهي تشجعها) يلا بدور.. tell me everything
بدور وهي تلتفت عن اختها منعنا لاي من المشاعر ان تظهر على ويهها: there is nothing to tell
حور وهي تهف من الملل: اوووووووووه يا بدووووور بسج من هالدور المأساوي.. اعرف ان اللي في يدج من عند احد ولازم انتي تقوليلي من عند من؟؟
بدور وهي تبتسم بتشويق في ويه حور: موتي.. ما بقول لج؟؟
حور وهي تناظر اختها بكررره مصطنع: شريرة تدرين؟
بدور وهي تفتح عيونها بحركة شرية في ويه اختها: لحد النخاااااااااااع
حور وهي تضربها بخفة على جتفها وتمشي: you are no fun (انتي مب مسلية)
بدور وهي تضحك على اختها وروحها لمرحة: never intend to be (ما نويت اني اكوون)

راحت حور وظلت بدور واقفة شوي الى ان شاركت القاعدين بقعدتهم وهي تفكر في عبدالله بقوة... لا يكون بس اهو هناك ينتظرها وهي قاعدة هني.. امممممممف.. ما بتقدر تعرف الا اذا راحت...

انتبهت لنفسها... وشفيج انتي يا بدور الي وايد مهتمة لكونه موجود ولا لاء؟؟ خله موجود.. احسن.. خله يبرد في الجو البارد هناك.. يمكن تصيبه نزلة ببرد ويمرض وتصيبه حمى يفقد فيها عقله ويصير مجنون رسمي معترف به.. ابتسمت ويا نفسها على هالفكرة الشريرة ولكنها ما تمنت هالشي طبعا انه يصير.. لكنها اكيد كرهت هالشعور اللي فيها وهالحماس انها تعرف بوجود عبد الله ولا لاء...

حارب وهو يحرك من مكانه بتعب: يلا يا بنيات جهزوا خلونا نروح بيتنا
سادت الدمدمات بالرفض والكل قعد حارب واولهم الجازي: وين رايح يا حارب خلك هني؟
حور وهي تحث خالها: أي خالي خلكم هني بنلعب مونوبولي الحين
ناظرها علي وكانها انسانة ما عندها اهي ذرة عقل ورد على حارب: خلك يا حارب العشى بيجهز الحين
حارب وهو يبتسم بحرارة على هالترحيب الكبير: ودي والله ياخوي بس الحرمة سافرت اليوم وعبدالله من الصبح للحين وهو تام لحاله
موزة وهي تذكر اخوها: أي والله عبدالله مادري عنه اليوم ولا اتصلت فيه؟
عايشة وهي تهمس لبدور: من زينه عاااد هالصخلة..
كتمت بدور الضحكة وهي ترد على بنت خالها: عيب عليج هذا خووج
عايشة وهي تناظر بدور بعين وحدة: اسمع من يتكلم.. مادري من اللي يبي يشربب من دمه
الجازي لحارب: اتصل فيه يا حارب ووخله ايينا هني يتعشى ويانا مرة وحدة..
حارب وهو يناظر اخته بنكران وكأنها تجهل الحقيقة.. بس لحظة.. اهي تجهل الحقيقة وتجهل تصرفات عبدالله تجاه العايلة اول ما وصلوا: لا يا وخية خليها لمرة ثانية .. انا بعد تعبان واليوم ما رحت الدوام تلاقين الشغل متكدس طوابق على راسي..
عايشة وهي تمسك يد بدور من جهة وحور من جهة ثانية: انتو رووحوا انا بتم هني.. (تكلم الجازي برجاء) عمتي ما عليه ابات عندكم؟؟
ضحكت الجازي ورحبت بها: جفن فراشج وجفن يغطيج يا روحي
عايشة وهي فرحانه بالحيل: يااااااااااي ببات في بيت عمتي
موزة وهي تهبط من امالها: مافي مبيت اذا انتي رقدتي هني انا من يرقد وياي؟
عايشة وهي تناظر موزة بكره: البعبع..
موزة وهي تضحك: يلا خلينا نروح الحين ونجهز لنا لقمة ناكلها..
عايشة وهي ترفض: يبا خلني ابات هني الليلة واللي يسلمك
حارب وهو يسكن ونين بنته: مرة ثانية عواشي..
عايشة بهزيمة نكراء: لا تقص علي وتقول لي مرة ثانيييية..
حارب وهو ويحك جبينه: يا الله من هالبنت.. يا عايشة يا حبيبتي بكرة الاربعاء وانتي وراج دواااام
ناظرت عايشة بدور برجاء عشان تقنع خالها ولكن بدور صدمتها: صح كلامه خالي.. روحي البيت وان شاء الله بالويك اند
عايشة وهي تناظر موزة بلووم: شفتي شلون قلبتيهم علي انتي ويا ابوج.. لكن اللي يحاجيكم اذا ردينا البيت.
موزة وهي تقرص خد عايشة بصبعها بدلال: وي فديت اللي يخاصمووووني
دفعت يدها عايشة بدلال ولفت بكرسيها للباب: اللي بيي ايي لاني راااايحة خلاص

ضحك الكل على حركات عايشة وتوادعت موزة ويا بنات عمتها ووقفت شوي عند عمتها تبوس راسها وتتحمد على سلامتها..

وعلى جذي راحت موزة وعايشة ويا ابوهم وظل علي مع عايلته في البيت..

الجازي من بعد ما تنهدت براحة شديدة وراسها على جتف زوجها وراس بنتها نور النائمة على ريلها: الحمد لله لاننا رجعنا الى بلادنا.. (ناظرت زوجها بامتنان) شكرا يا بو سرور.. اشكرك جزيل الشكر..
علي وهو يلثم جبين زوجته بحنان: غالية والطلب رخيـص يام البنات.. انتي تامرين وتنهين ..

اما بدور فصبرها ضاق فيها ولبست جاكيتها وقببل لا تطلع وقفت جدام ابوها: يبا انا بطلع شوي اتمشى
علي وهو مستغرب: يبا الدنيا تمطر وين بها؟؟
بدور وهي تطلع له الطاقية الجلدية اللي بتحميها من الماي: بس شوي على طول المزرعة وراجعة...
الجازي وهي تناظر بدور بهدوء: يمة خليها لباجر الحين الدنيا ماطرة واخاف عليج من الرشح
بدور وهي تترجاهم بهدوء: بليز بليز عاد والله خاطري امشي في الجو وهو جذي.. والمطر مب ثقيل بالعكس tender (خفيف)
الجازي وهي تبتسم وتناظر علي وعلي يعطيها الاذن بتنهيدة: alright روحي .. بس لا تتأخرين مابيج تظلين برع وايد..
بدور وهي تطلق عليه حجة بارعة بسخرية: بابا كل المكان منطقة واحدة ..
علي وهو يناظر حرمته اللي ضحكت على جملة بنتها لابوها بتأنيب: فرحانه؟
الجازي ووهي تتنهد براحة: وشلون ماكون.. وانا بينكم من يديد..

لم علي حرمته بهدوء وحمد الله على هالغيث والخيـــر الدال على نعمة الله الوافرة اللي اهم يمرون بها هالايام..

مشت بدور لمن وصلت الى الاسطبل والمطر الخفيف يبللها.. دخلت الاسطبل وهي تنفض قطرات الماي عن قبعتها ومشت بسرعة الى الساحة الثانية تدور عبدالله ان جان موجود لكنها وقفت بخيبة الأمل المفاجاة بداخلها لان الساحة خالية ودارك في كبينته قاعد ياكل..

نزلت راسها بدور وهي تعض شفايفها.. وينه عبدالله وليش مختــفي؟؟ هاه.. اكيد خاف من التحدي .. عرف اني بغلبه فيه وما حب انه يواصل فيه... صج انه نموذج مثالي للرياييل..

بدور وهي تتكلم ببرود شديد: عشان مرة ثانية يعرف نفسه قبل لا يتحــدى اهو يتحدى من... الغبي الأهبل.

حست بالظيــق على الرغم من احساس النصر الزائف بداخلها .. تمنت لو انه بالفعل يااا وبالفعل دربها لان شوقها الكبير الى التدريب غلب أي شعور من مشاعرها.. لكن الحين اهي لا راح تتدرب ولا راح تركب فرس طول حياتها ولا احد بيقدر يجبرها على خلاف هالشي... تباً للرياييل وتباً لعبــدالله...
وبدل لا ترجع البيت دخلت كابينة الفرس الحامل وقعدت هناك تنتظر من غضبها انها يتنفس...

-=-=-=-=-=-=-

وصلت سيارة حارب الى البيت وفتح البوابة بالجهاز الالكتروني اللي عنده ودخل البيت.. ولدهشته شاف ميلــس الرياييل على الجهة الشرقية من البيت انواره مولعه.. فاستغرب من اللي بيكون عندهم...

حارب ووهو ينبه بناته: ترى امكم سافرت اليوم المغرب... ان جان ما تدروون
موزة وهي مستغربة سكتت وعايشة استجوبت: سافرت؟؟ وين راحت؟؟ وليش؟؟
حارب وهو يركن السيارة في الكاراج: راحت لبنان عندها عمل خيري هناك بياخذ منها وقت.. (ناظر عايشة اللي كانت عيونها متوسعة من شدة الاندهاش) انتي ادرى بامج يا عواشة..
عايشة ووهي تشخر بسخرية: ولا قالت لي.. تخاف اقول له اتييب لي صوغة.
موزة وهي تتكلم من غير ما ترفع عيونها: تدرين فيها اتييب لج شي في كل سفرة
عايشة بسذاجة: بس هاي لبنان مب أي مكان عادي.... (برطمت) ياليت خذتني وياها عشان اشوف البرايم الأول لستار اكاديمي 3..
حارب باستغراب: ستار شنو؟؟؟؟

ضحكت موزة على ردة فعل ابوها الجاهلة لهالبرنامج الساحق في الوطن العربي.. وطلعت من السيارة من بعد ما خف المطر وترك اثاره على الأرض وبللها او طهرها تطهير وصل إلى عمق العمــق.. طلع حارب كرسي عايشة من الصندوق وحطاه جدام بابها وحملها براااحة وحطاها على الكرسي..

عايشة بحبور: مثل عمي علي اليوم يوم يحمل عمتي الجازي.. واااااااااااااي حده رومانسي..

ضحكت موزة على اختها ولكنها شافت ابوها يتوجه الى الميلس الخارجي ونادته

موزة: يبا وين رايح؟
حارب وهو يلتفت لبنته شوي ويرجع لمسيرة: رايح الميلس.. مضوى مادري من هناك.. دشي البيت ويا اختج انتي..
موزة بادب: ان شاء الله.. (تواجه اختها بتنهيدة عميــقة) يلا بينا اميـــرة عواشة..
عايشة بتكبر: لو سمحتي.. عايشة الجميــلة ولا ما يمشي الكرسي..
موزة وهي تدفعها: جميــلة انتي.. يلا جدامي وايد تدلعتي اليوم..
عايشة وهي تضحك بمرح: هاهاهي.. يحق لي..

دخل حارب الميلــس وشاف هناك ولده عبدالله قاعد مع شخص غريب غير مألوف شكله واول ما بدى بدى بالسلام وعيونه تجول على جناط السفر اللي خلت جسمه يرتعش..

كانت هيبة حارب قوية بعيون محمد وصوته اعمق: السلام عليكم
قام محمد على طوله وباحترام شديد حنى راسه ومد يده للسلا: وعليكم السلام والرحمة
حارب وهو يسأل عن الأحوال ولكن عيونه على الجناط: جيف حالك يا ولدي عساك ابخير
محمد بكياسة وهو مندهش من الشخصية القررررريبة جدا من شخصية كايد في الخلق: ابخير يا عمي والحمدلله عساك ابخير
حارب لعبدالله: يبا عبدالله شلونك؟؟ شخبارك؟؟
عبدالله وهو يتجدم لابوه ويبوس راسه: ابخير ياويه الخير والحمد لله..
حارب بكياسة سأل ولده: وصلـت امك؟؟
عبدالله وهو يرد بادب شديد: أي يبا وصلتها..
حارب وهو يبتسم في ويه محمد من بعد ما جالت عيونه على الجناط: ما تعرفنا عليك يا ولدي.. ؟؟؟ صديقك عبدالله
عبدالله وهو ينفي بشدة: لا لا .. مب صديقي... هذا.. محمد بن الفيــصل.. ارفيج... (بلع ريجه وقالها ) ارفيــج ناصر..

هدرت دقات قلب حارب مضجعها وارسلت زلزال بعروقه من الخوف والفزع...

حارب وهو يناظر محمد بخوف وهلع: ارفيج ناصر؟؟؟ ليش ناصر علامه؟؟؟ وينه ناصر؟؟؟
محمد ووهو يهدي حالة الأب اللي كان الخوف مثل الشبح بعيونه: لا لا ناصر بخير والحمد لله... اهو.. اقصد احنا تونا واصلين من اميــركا لهني!!
حارب وهو ضايع مع نفسه: انتو؟؟؟؟ من انتو؟؟؟؟ (ضاع اللون من ويهه وهو يطرح هالتساؤل بصوت) ناصر وياك؟؟؟
هز راسه محمد بابتسامة هادئة : أي نعم وياي وصل..
حارب وهو يحس بنفسه يطير مكانه وبانفعال سأل عبدالله: وينه الحين؟؟؟
عبدالله وهو يرد باحترام: في داره يغير هدومه. وقف في المطر وتخيس..

خطف حارب من عند الصبيان وهو يستأذن ومشى للصالة..

موزة توها تدخل الصالة مع عايشة وهم يضحكون وينكتون مع بعض يوم شافوا ابوهم يدخل للصالة من باب المجلس الشرقي....

توها موزة بتتكلم مع ابوها الا واحد ينزل من الدرج توقعته عبدالله.. لكن ابتسامتها الي كانت تعدها لعبدالله سرعان ما هربت من ويهها وحل مكانها الصمت والذهول وال... سكينة..

نزل كايد من على الدري بهدوء وهو يمد براسه لتحت يشوف الواقفين .. واحد على يده اليمين عند باب خشبي بني عريض اللي اهو طلع منه قبل شوي... وبنتين على الباب... على طول اتضحت الرؤيا بعيونه وبينت وجوه الناس الواقفة...

غاص قلب موزة وعايشة اصدرت شهقة عميــقة من داخلها... اما حارب فتجدم خطوات الى الشاب الواقف وكأنه تلميذ مدرسي مذنب..

حارب وهو يناظر كايد وثمه منفرج بدهشة وعيونه مفتوحة... ماقدر انه ينطق بشي او يقول شي.. فذاك الشاب ابو 19 سنة تغير وتبدل وصار ريال وله لحيــته النابته وملامح الرجوله تكسوه من راسه لاخمص ريــله.. وطوله فارع وشعره طويــل وعيون سالمة متوسعة برموش بنية..

حارب وهو يهمس لكايد بألم واضح: ولدي... ناصر.... ناصر..

بلع غصته كايد وما درى شيسوي.. الا انه تجدم ومد يده المرتجفة يصافح ابوه الواقف بدهشة ووذهول..

كايد بصوت مرتجف وكأنه بيبجي: عاش من شافك ... يبا...

ناظر حارب يد كايد الممدودة جدامه.. حاول يمد يده لكن لا.. ما راح يكتفي من هالمصافحة.. لكنه بعد مد يده.. واول ما لمست راحته راحة كايد سحب ذراع الولد لحظنه من غير اهتمام وسحقه ما بين ضلوعه وهو يضمه ضم الأب لولده البعيد الغايب المهاجر...

انفجارات في قلب كايد ما ساعدته على انه يكون ردة فعل لهالضمة الشديدة المميتة.. ويوم استوعب الوضع عانق ظهر ابوه وكأن هالجثة اللي ضامته مب ابوه.. ويوم حس له انه قريب منه بهالصورة اشتدت ضمه كايد لابوه .. واستمرت بالانشداد الى ان صار تلااااحم ما بين الجسمين ما يمر بينهم الهوا.. سالت دمعاات كايد على جتف ابوه وماقدر الا انه يوسد جبينه ذاك الجتف الحنون اللي اهو ما ظاقه ابد بيوم مثل الياهل اللي ينحمل على الجتف ويدورون به في الطرجات او في البيت او حتى ينيمونه عليه..

فرج حارب عن كايد اللي كانت دمعته الرجولية سايلة وسرعان ما مسحها حارب عن ويه ولده.. ابتسم وكأنه ما يصدق وظيج عيونه يمنع الدمعة من السيلان ورد ضم كايد بشدة اليه وهو يناديه: ولدي.. ولدي .. ولدي..

ماقدر يتكلم كايد ولا قدر ينطق.. وعبدالله طلع من الميلـس من بعد ما استأذن محمد اللي كانه يشوف الوضع اللي يمر فيه كايد.. وابتسم وتأثر اشد التأثير ووحمد الله وتمنى لو انه يركع لعظمته في ارجاع كايد الى مثواه الاصلي..

ظل عبدالله واقف على الباب ووهو غير قادر الا على التأثر الشديد لموقف ابوه من كايد .. ناهيك عن الغيرة الي نهشت قلبه ولكن ظل يذكر نفسه ان كايد يستاهل هالشي لانه راجع من بعد غربة...

فج حارب عن كايد وهو يبتسم في ويهه ويمسك ذراعه الصلبه بشدة وكأنه فخور بهالريال اللي من صلبه..

حارب وهو يبتسم في ويه كايد: شلونك يبا؟؟؟ عساك طيب؟؟ شلون الرحلة وياك؟؟
كايد وهو يتكلم بصوت متهجد وهو يمسح بظاهر يده دمعاته الجارية: الحمد لله .. الحمدلله يبا.. أنتو شلونكم شخباركم؟؟؟ (وبنبرة صادقة وعيونه ترتفع في ويه ابوه الحنون) ولهت عليكم وايد..
حارب وهو يربت على جتف ولده بشدة: واحنا بعد يا ناصر.. واحنا بعد.. وخواتك (مد بعيونه كايد للبنات الواقفات عند الباب وما تحركوا لحد هاللحظة) خواتك ما نسوك بولا يوم.. ودومهم يذكرونك ويتمنون رجعتك.. وان رجعت انت بيوم فهو لدعوات موزة اللي ما سكتت بيوم عن طرى اسمك..

رفع عيونه كايد الى اختيه الواقفتين عند الباب.. وعلى طول تعرف عليهم.. اللي على الكرسي وهي مغطية ويهها بيدينها تخبي دموعها عايشة.. والواقفة وحيلها منهد وهي تناظر ودمعتها تصب من عيونها من غير ما تستوعبها اهي موزة.. لكن امس قبل لا يسافر كانو بنات صغاااار على ويوهم سنى الشقاوة واللعب والفتية.. واليوم لاااا.. كببرروا وصاروا حريم وكل وحدة تنافس الثانية بالجمال...

تجدم كايد صوب البنات وهو يبتسم ويكبت الدمعة من انها تجري من عيونه.. وكل ماله يتقرب وعايشة اللي تحس بقربه منهم تشهق بالبجي وتكشف عن فرحتها العظيمة..

راح كايد لموزة اول... حط يده على مفرق راسها وهي سكرت عيونها مب مصدقة اللي تشوفه.. تجدم منها وبشفايف مرتجفة باس جبينها وضم راسها لصدره... موزة ماقدرت تتحرك بالاول.. بس بعدين حست بالدم الحار يجري فيها وماقدرت الا انها تتشبث فيه مثل اليهال.. لمن طال تشبثها وعلى صوتها بالبجي والنياااح وهي تلتزق بجسم اخوها باكية بحرارة..

موزة وهي تشم ريحة اخوها وتحسها ريح الجنة: ناصر.. ناصر يا نظر عيني ياناصر.. .ناصر ياخوي.. ماصدق.. ماصدق.. انا بحلم ولا علم؟؟؟ بحلم ولا بعلم ياناصر...
كايد وهو يمسح على شعرها بحنان كبيــر ودمعته تجري على طول انفه السليل من زاوية عيونه..: علم يا موزة.. فتحي عينج وشوفي.. ناصر رد لج..
رفعت راسها موزة وهي تناظر ويه اخوها وهي تسمي بالرحمان عليه.. باست خده وهي ترتجف: حمد.. حمد لله على السلامة... حمد لله على السلامة يا خوي..
كايد وهو يبوس جبينها للمرة الثانية: الله يسلم غاليج ومغليج ..

انحنت عيونه الى عايشة اللي بعدها مغطية عيونها وتبجي وتهتز بوسط نوحاتها... فما كان من كايد الا انه ينحني لها على ركبة وحدة وهو منزل راسه يطل علىويهها اللي اخي مخبيته زين بين اصابعها الطويلة..

كايد وهو يبتسم ويذكر اغنية قديمة كان دايما يغنيها لعايشة لحد ما كبرت وتمت تغني وياه هالاغنية.. فما كان منه الا انه ينطقها بصوته الحزين وهو منحني يطل على ويهها..

كايد بصوته الجميــل: حمامة نودي نودي... سلمي على سيودي.. سيودي راح المكة.. اييب ثوب العكة.ز
ردت عليه عايشة بين ايدينها وهي تغني وويااه: ويحطه في صندوقي... (واختلط صوتها بصوت كايد واصابعها شوي شوي تنزل عن ويهها) صندوقي ماله مفتاح.. والمفتاح عند الحداد...
كايد وهو يضحك بين الاغنية بشهقات ودمعته تسيل بحرارة على ويهه وعايشة تجابله بويهها الشديد البراءة والجمال: والحداد يبي فلوس... والفلوس عند العروس..
عايشة وهي تقول شي ثاني مختلف عن الاغنية: ناصر مضيع الدروب... لقى دروبه ويانا... (وجهت له الكلام هالمرة وهي تناظر ويهه بعيونها المحمرة وخدودها المتوجهة بالبجي) لقيت دروبك لنا ياناصر.. ورجعت؟؟؟
هز راسه كايد بالايجاب وهو يقرب ويهه منها ويبوس مفرق راسها: وشلون ما رد.. وانا الحمامة اللي تطيرينها وترجع لج يا عايشة.
عايشة وهي تستغرق بالبجي والكلام الغير مفهوم: تأخرت وايد لكن..
كايد وهو يرفع جتفه دلالة على قله الحيلة: ضاعت دروبي.. ولكني لقيــتها الحين... سامحيني عواشي..

ماقدرت تقول أي شي جدام ابتسامة هالريال اللي اهو اخوها.. حست بالفخر والعز والدلال بس لان عندها اخو بسنا كايد.. فما كان منها الا انها تعانق رقبته بشده بذراعاتها وهي تميل جسمها من على الكرسي وكايد يتقرب منها ويلمها عنده بحظنه وهو يضحك عليها..

عايشة وهي حاكره اخوها وحاطه خدها على جتفه: خلاص مافي تروح... ضيعت دروبك مرة والحمد لله انك لقيتها.. ما خليك الحين.. والله ما خليــك...

تمنى كايد بذيج اللحظة ان تهديد عايشة يتحقق وانه يتم وياهم على طول.. ما قدر يصدق انه بيلاقي عايلته اخيـــرا وبيلاقي اهله واحبابه. وبناته الصغار اللي كبرروا...

فجأة الا بموزة تقعد على ركبتها وتلم اخوها من جهة ثانية وهي تريح جبينها على جتفه وكأن الحمل طاح عنها وهي تحس انها طير يرفرف وتقدر ترتاح..

فناصر.. لقى دروبه .. وعاااد..

نهاية الجزء العاشر..

الصلاة والسلام على أشرف الأنبياء والمرسلين سيدنا محمد وعلى آله وصحبه أجمعين

بارك الله بك , شكراً أختي الكريمه على هذه القصه