(حمران النواظر) **انــتي وانا.. (مذكــرات أم)**

الجزء الثاني
---------------
الفـصـل الــأول
---------------

صباح جميـل.. عطر ولذيذ.. يتنفسه كل انسان يقدر نعمة الحياة.. ويقمته كل انتحاري غبي تملـئه الهواجس والجنونيات..
تتمتع الحياة بمباهج محد يقدر يقدرها في العوالم المتعددة... الا في عالم البساطة والتواضع.. وين ما تكون ريحة الخبـز البلدي فايحة في ارجاء الدهاليز والاروقة.. والمزارع منتشية بخليط الندى اللطيف والثمـر الناضج.. شجر الليمون يغطي بكثافته طبقات من الجليد الهش الناعم..


وفي نيويورك.. كان الخريف في اوج جماله.. مثل البنت اللي تنطلق من شرنقة الطفولة الى عالم المراهقة وحيث ما تتبدل ملامحها الطفولية الى انثوية غامرة.. حمرة خدود من غير خجل وتمايل بعقل.. وخرير مياه الهدسن يغطي اصوات قبيحة تهدم من هالصباح الجميـل..


وثاندر كان له الحق انه يتمتع بهالجمال.. فحياة اللي انضمت ككل صباح احد لكايد وظلوا يتمشـون في ذيج الصبحية الخالية من المشاغل..


حياة وهي تقفز عن نقعة ماي في حفرة بالأرض المنخفضة:.. ومن بعدها يا خطيب جملووه ولببسها الدبلة.. اقول لك.. كان لابس اكثر بدلة انيقة.. ارماني ونكتايها بالفيروزي والاخضر الهادئ..
كايد وهو يدخن الزقارة وبيده رسن ثاندر اللي يمشي بهدوء يمه:.. اسف لاني ما ييت.. اكيد صارت حلوة جميلة..
حياة بابتسامة ناعمة: حلوة بس؟؟ احس ان الله سبحانه وتعالى نعم عليها بجمال إلهي بذيج الليلة.. تقول امي ان الله ينور ويه العروس بليلة زواجها..
كايد وهو يناظر ويه حياة المفعم بالحيوية:.. وانتي تبين جذي؟
حياة باستغراب: off course في بنت بهالعالم ما تبي هالشي؟؟؟
كايد وهو يناظر جدامه: I know I don't
حياة : هههههههههههههههههههه وانت اصلا ريال شلون تتمنى شي لبنت..


سكت كايد عن حياة لانها يمكن تعرف عنه اشياء وايد الا عن عاهته القبيحة.. على الرغم من عرجه البسيط الا انه يملك توازن قوي في مشيته.. ونحل جسمه مساعده في الاستقامة .. كان يمكن اضغف ريال من ناحية الوزن الا ان شكله كان مقبـول.. وحياة كانت اقصر منه بقدم وتمتلك قامة رياضية بفعل العناية الدائمة لنفسـها.. وكل من يمشي ويشوفهم مع بعض – حسب تفكير حياة- يظن انهم كوبل مثالي..


حياة وهي تدفي يدينها من الهوا البارد: شلون نسيت القفازات؟؟؟
كايد وهو يطفي الزقارة:.. بردانه؟
حياة وهي تناظر ثاندر: ميتة.. لكن ماظن ان كتلة الشعر بيرضى نوقف في مكان؟؟
كايد وهو يفصخ القفازات ويعطيهم حياة:.. لا تسيئين الظن بثاندر.. تراه جميل في الاوقات اللي يتمنى انه يكون فيها جميل.. وحاله من حال البني أدم.. له اللحظات اللي يتحمل فيها اللي يبيه وله من اللحظات اللي ما يتحمل..right boy??


ويات ملامح حور تعبث في خياله للمرة الألف.. من شافها قبل يومين لهاللحظة وهو مو قادر يستوعب اي نوع من التأثير ملكته البنت عليه.. واي نوع من العاطفة اللي تشده الى ذاك المقهى الصغيـر.. واي نوع من الراحة النفسية اللي لقاها لاول مرة يمكن في غربته الطويـلة.. لكنه ما تجرأ انه يوطي قدم هناك.. يمكن لانه كان مشغول.. او ادعائه بالانشغال.. مع ان محمد طلب منه انهم يروحون لاكثر من مرة لكنه دايما لقى في قلبه الرفض اهو الخـيار الأول..


حياة وهي تهزه: .. hello? Earth to Kayed? Come in Kayed
كايد وهو يضحك يخبي الخجل اللي فيه: شفيــج حياة شوي شوي علي من الصبح..
حياة وهي تحس بقبظة في قلبها.. كايد وسرحان.. يا ترى في شنو:.. خبرني شخبار الديفيليه اللي رحته ويا البرنس؟؟
كايد وحور ترجع في باله: كان اوكيـه.. اسمعي.. شرايج لو اعزمج على مكان انترييق فيه؟؟
حياة وهي مبتهجة: تعني مكان كوفي شوب؟؟
كايد وهو يبتسم ويدينه في مخابي الجاكيت الجلدي: ايه كوفي شوب.. شرايج؟
حياة وهي مبتهجة: wow احب اروح وياك كوفي شوب.. بس تعال.. هذا شينسوي فيه؟؟
كايد وهو ناسي ثاندر: منو؟؟
حياة وهي تأشر على ثاندر: that guy?
كايد وهو يتذكر ثاندر وياهم ويتكدر شوي.. لكن لو فكر فيها عدل الناس وقت الحين ويمكن اهي ما تشتغل هناك الا بالليل...: Bummer (خسارة) في وقت ثاني عيل..
حياة وهي خايبة الامل صج: انزين ما يصير تقطه في الشقة ونروح؟
كايد وهو متعجب: تبييني اروح جهة ثانية من الcity وارد ارجع عشان ارد ثاندر.. no chance he deserves this Sunday for being a good boy for the last week, right boy?
( مافي مجال وهو يستاهل هالاحد لانه كان مطيـع وحليو طول الاسبوع صح ثاندر؟؟)


نبح بالمقابل ثاندر ووضحك كايد.. اما حياة فخاب املها وما حاولت حتى انها تخبي هالشي وكايد ما علق لانه يعرف طبع حياة ان تجادل وياها فبتوصله الى انه يسوي اللي اهي تبيه .... وجذي ظلوا يمشون وهو يحاول انه يتكلم في مواضيع مختلفة الا ان حـور ظلت في باله...


-----------------

كان بيت علي في حالة من الفوضى لان نسيم باتت معاهم ليلة امس والريوق زحمة والصوت والضحك والانس اللي بينهم متزايد وكأنه مب صبح ولكن ليل او سهرة.. وعلي – اللي حاول بجهد انه يخفي حزنه- يطبخ لهم ويسوي احلى السندويجات اللي ما تخطر على بالهم.. يحاول يتناسى الهم اللي فيه او الرجفان اللي ينتاب قلبه كل ما يشوف ويه الجازي اللي تحاول بكد انها تخبي هالازمة الصحية الكبيـرة..


ما تدري الجازي الا ان علي متراجع في قراره انه ما يخببرر البنات.. اهو يعرف بناته وايد زين.. اذا عرفوا في وقت متأخر راح تكون الصدمة عليهم قوية ويمكن تتخالط مع شوية من اللوم ليش انهم ما خبروهم.. تعود علي انه يشكي لبناته كل اللي يهم قلبه من الصغيرة الى الكبيرة.. وهذا اكبر شي يمكن يتحمل قلبه وما يقدر حتى انه يفتح ثمه يخاف تخونه العبرة وإلا لسانه ينطق باللي يمررّ الخاطر.. فآثر الصمـت والابتسـام ومناجر خفيف مع نسيم ..


نسيم ووهي تضرب حور على يدها وتساسرها:.. عيل يبيج ترسمين له احد؟؟؟؟
حور ووهي متوهجة بذكرى خلف على قلبها:.. اممهممم.. ومب اي احد.. شخص غالي وعزيز.. اكيد ابوه ولا اخوه الكبيـر..
نسيم: او يمكن اخته ولا امه...
حور وهي فرحانه: تخيلي اشوف صورة امه ولا احد من اهله...
نسيم وهي مبتهجة بغباء:... يعني انتي في دربج نحو السعادة..
حوووور بصوت مكتووم:: yaaaay
علي ووهو منبته لهم:.. شعندهم اتبسبسون فيه؟؟
حور وهي تلتفت لابوها بشوي من المفاجاة:.. ولا شي يبا... Nothing
نسيم وهي تحاول تبعد انتباه علي عنهم:..Hey Mr. M (for mane3)
ينتبه لها علي وهو رافع حاجب: نعم مس. N
نسيم: nice sandwich في اي مدرسة تعلمته..؟؟
علي وهو يتخصر لها:.. تستخفين بدمج؟
ضحكت بدور وهي حاطه يدها على حلجها ونسيم ترد عليه من بعد ما بلعت ريجها:.. لا بس شكله تخصصي.. جم رقم الكورس؟؟
علي وهو يستخف عليها:.. تفكرين تدرسين؟
نسيم: لا والله ادخله في الyellow pages هاهاهاهاهاهاااااااااي..


الكل سكت وعلي بنظرة استصغار لنسيم يرجع الى الي كان مشغول فيه وبدور تلتفت لنسيم..


بدور: مشكــله الجيل المهجن من الحريم اللي مثلـج.. ان فورميولا العقل ناقصة.. فما عليج اي ملام!!
نسيم وهي تلتفت لحووور باستغراب: شتتكلم ذي؟؟ لغة اهل المريخ؟
بدور وهي تواصل بسخرية: ما تنلامين ترى.. بسألج سؤال يا نسيم؟؟ من واحد لعشرة جم تعطين نفسج؟؟
نسيم وهي ترفع حاجبها:.. 11 من عشـرة
بدور وهي تضحك وملامحها الجميـلة تكتسب اللون الاحمر الحلو:. رحم الله من عرف قدر نفسـه.. مبروك عليج انتي ناجحة وتفوق بمجال الغباء..
قامت نسيم لبدور: والله لا وريج يام اربع عيـون..
مسكتها حوور : خليها تولي
نسيم:شفتي شلون استغفلتني..
حور: ignore ما عليج تجاهليها.. (تلتفت لابوها) وينها امي اليوم؟
توه علي بيتكلم الا الجازي نازلة من تحت وهي تسولف ويا نور بنتها:..صباح الخيـر
البنات وبدور اللي من الصالة: صباح النور.
راحت سرور ولمت امها بطريقة الصديقات:.. Hello girlfriend وحشتيني.
الجازي وهي مستغربة: شوحشتج؟؟ ناسية امس ويا اختراعاتج الطبخية؟؟؟ (توجه كلامها لزوجها) هلا بو سرور. شلونك؟
علي من غير ما يناظرها:.. الحمد لله بخير بشوفتج..
حـور وهي تكلم امها:.. يمة يالله فطري عشان نروح المول ..
الجازي وهي ناسية: شموله؟؟
حور وهي تاشر بعيونها صوب ابوها عشان ما يسمعهم لانه ما بيخليهم عشان يروحون المطعم..: يمة..
الجازي وهي تنتبه لنظرات بنتها وبصوت منخفض:. ااااااه المول.. (تتقرب من بنتها بهدوء) ماظن ان اليوم يوم مناسب!
حور وهي فاتحة عيونها بصدمة وخيبة: but you promised
الجازي: I know بس ابوج اليوم يحتاجني في المطعم.. (بنظرات لطيـفة) خليها ليوم ثاني واوعدج هالمرة..
حور وهي تلعب بالأكل:.. ادري ان ماكو مرة ثانية..
الجازي: come on hoor don't be like that
حور وهي تقوم من الطاولة:.. انا بمشي الحيـن..
علي وهو يلتفت لها والمريلة مربوطة على ثيابه من بعد اصرار من نوور: وين؟؟
حـور وهي مو مصدقة ابوها لانها توها امس قايله له: قلت لك بروح المجمـع ابي اشتري لي جم قطعة ملابس.. الشتا ياي وانا ما عندي الا الجاكيـتات القديمة..
علي وهو ياكل من الفرنج فرايز اللي يسويه: زين خذي وياج وحدة من خواتج
حور ببرود: نسيم بتيي وياي..
علي: خذي وياج وحدة من خواتج احسن .. وبدور خذي معاج عشان تدور لها على جاكيـت تلبسه.. اذكر انها قالت لي انها تبي جاكيت..
حور وهي مليانة غيض:.. الحين انت تذكر اللي قالته لك بدور من فترة.. لكن اللي اقول لك عنه من يوم او اقل من 24 ساعة تنساه؟؟ ليش يعني لانها الbright student البنت المباركة والافضل فيما بيننا..
الجازي وهي تحاول تهدي نبرة حور الزعلانة: حووور بلا مجادلات ارجوج..وابوج مو قصده جذي
لكن علي ما سكت:.. وليش يعني تحسين انها ما تستاهل؟؟ وحدة منكم وصلت للي اهي واصله له؟؟؟
حـور وهي مندهشة: انت لا تصدق.. يعني شتبيني اسوي عشان اوصل لها. اصابعك يدك مب سوى عشان كلنا نكون نفس الشي..
علي وبصوت هادئ مثير للغضب: صح كلامج لذا لا تزعلين اذا تفاوتت المعاملـة بيناتكم لان اصابع يدي مو سوى ووكل وحدة منكم تستاهل المعاملة اللي تتعامل بها..
حـور وهي تبتسم بسخرية: كل اللي ناقص تقوله انك تكرهني وتفضل بدور علي..
علي وهو يمد بعيونه الناعسة في ويه بنته اللي في اوج تمردها وقله احترامها يمكن: ما اكرهج.. لكن افضل بدور عليـج.. لسبب واحد بس..
حـور وهي تتخصر: فاجئـني وقول لي..
علي: مطيـــعة.. Obedient مو مثلج متروسة تحدي واستفزاز وتمرد..
الجازي وهي تحس ان الوضع تأزم مرة ثانية بين زوجها وبنتها: علي ارجوووك..
حور وهي ترفع جاكيتها بقوة: ما احتاج اني اسمع كل هالكلام.. يالله نسيــم.. باي.
الجازي وهي تهز راسها: ياربي ياربي...
علي: روحي وراها وقوليلها تنتظر اختها...
الجازي وهي تناظر علي من غير تصديق:.. علي ليش جذ..
قاطعها علي بصوت حاسم: روحي ووخبــريها ... ما عندي بنات يمشون رايهم علي.. ريال بشنباتي ما تحترمني؟؟؟ مو منها لكن.. من هالغربة الزفتة الي معيشنهم فيها...اتحمل الذنب.. اتحمله من راسه لكرياسه..

هزت الجازي راسهها وعورها قلببها من كلام زوجها واكثر شي من اسلوب حور اللي يتسم بقلة الادب وويا ابوها .. وطلعت من البيت وراحت لوين مابنتها واقفة.. تحت المحطـة الصفـرا اللي تنتظرهم في نص الشارع الرئيسي اللي يطل عليه البيت.. مشت الجازي بجاكيتها الخفيف اللي تلمه علىنفسها عشان ما يختـرق عظامها الهوا البارد..


حور وهي واقفة بتململ مكانها وشعرها الناعم بالعادة مجعد اليوم.. ويوم التفتت لوراها شافت امها وبنفس الوقت شافت امها دموعها.. فحاولت انها تمسحهم بكبرياء واضح...

الجازي: حور يمة
حـور: لا تحاولين ماما... (بصوت مليان غصة) خبري المطيعة اني ما بنتظرها هني طول اليـوم..
الجازي وهي تمسك بنتها اللي صارت بطولها: حور حبيبتي سمعيـني
حور ووهي مخنوقة: يمة ما شفتيه شلون يعاملني.. وشلون يعامل خواتي؟؟؟ ليش يعني؟؟ لاني ما ابي ادرس اللي يبيني ادرسه ولاني ما ابي اشتغل في مطعمه المقرف..
الجازي: المطعم المقرف هذا اهو اللي كببركم ووكلكم وحط سقف على راسكم يا حور.. لا تستهزأين باللي ابوكم يسوييه عشانكم..
حور: عيل سمعتيه شقال؟؟ انه يفضل بدورو علي؟؟ هاي السخيفة ام العبارات الذكية..
الجازي: يا حور انتي تدرين واكثر وحدة في خواتج بمحبة ابوج وعشقه لج
حور وهي تطالع الجهة الثانية بعيد عن ويه امها: يتهيأ لج...
الجازي وهي تسحب ويه بنتها: طالعيني لمن اكلمج.. (ولفت حور ويهها لامها بنظرة كسيـرة) انتي في هالبيت صاحبة الصوت.. انتي اللي تقدرين تغيرين من روتين البيت بسبب افكارج وتمردج.. لكن حطي في بالج.. ان بين التمرد وقلة الادب شعره.. وقت ما تنقص خلاص تتخالط الاوجه ويصير كل شي من غير حد ويجلب معاه نتايج سلبية..
حـور وهي تحس بالغصة مزحومة بها:.. بس يمـة انا ماقدر اكون مثل ما اهو يبيني.. ويقهرني اذا يبي يسيرني مثل ما يبي.. شوفي سرور؟؟؟
الجازي: شفيها اختج؟؟؟ اهي حابة اللي اهي فيه وعمرها ما كانت من النوع اللي يحب الدراسة وانتي ادرى بها لانها اقرب وحده لج...
حور: بس انا مابي اكون مثلها؟؟؟
الجازي وهي تبتسم وتمسك ويها بنتها من الجهتين:.. يا عمري انتي عمرج ما كنتي مثل احد.. كنتي طول عمرج البنت الفريدة.. Unique وعمرج ما انصعتي لاحد. وعمرج ما كنتي مأمورة من احد.. فما ابيج تتغيرين ولا تخلين احد يغيرج.. بس ابي منج شي واحد...
حـور وهي تنظر لامها الغالية بحنان:.. عيوني لو تبينها..
الجازي ووهي تبوس عيون بنتها وترد تطالعها:.. ابيــج تحاولين يا حور.. انج تبينين علاقة اقوى واشد احترام من هذي اللي تمر بينج وبين ابوج.. حاولي انج تكونين مؤدبة اكثر من جذي..
حــور وهي تناظر امها بلوم وتأنيب ضمير:.. اكيد زعل على كلامي له...
الجازي: ابوج ما يزعل منج لكن قلبه رقيق.. وخصوصا في هالفترة الحالية..
استغربت حور من كلام امها: شفيها الفترة الحالية..
تجمدت الجازي من نطقة لسانها .. شاللي ياب هالموضوع للسانها وجدام حور بعد:.. ها.. لا يمة بس اهو شوي.. يعاني من مشاكل في المطعم.. توسعة وما توسعة.. ولا تنسين بعد المصاريف الزايدة هالايام...
حــور وهي شبه مصدقة لكلام امها لان ابوها بالعادة ما ينطق بشي لمن يعاني من موضوع.. لكن من يومين ابوها بين انه بحالة غير طبيعية عن غير العوايد.. : بروح له واستسمح منه شرايج انتي؟
الجازي وهي تحاول انها تظهر ملامح طبيعية.. : اي حبيبتي... احسن شي تسوينه..
نسيم وهي طالعة من بيتهم تركض:.. wait for meeeee…
حور وهي تناظرها وتضحك: خبري الخبلة اني بروح وبيي..
الجازي وهي تبتسم لبنتها: اوكيــ


راحت حور وهي تركض لداخل البيت وقبل لا تدخل طلعت بدور وهي لابسة طاقية زرقا على راسها وشعرها الحريري معجف من الصوبين والنظارة طايحة على خشمها بصورة ناعمة وتبين مدى جمالها الحلو...

دخلت حور بيتهم اللي يسود فيه الاثاث الاحمر.. الاحمر والأخضر الغامق مع المذهبات اللي تطغي من الجو العربي في المكان.. وراحت لوين ما كان ابوها واقف ويا نووور في الحديقة... كل اللي سوته انها وقفت في ويهه وباسته على خده ويم اذنه همست بآسفة وطلعت من المكان بسـرعة.. وعلي يناظر خطاها وهو مندهش من حركتها واول ما التفت لجدامه يحاول يتناسى حركتها اللي كانت بمنتهى الحلاوة والظرافة وجزء من الطفولة اللي ما فقدنه بنات علي نظرا لمعاملة ابوهم لهم... فابتسم غصبن عنه وهو يعرف من اللي خلاها توصل الى هالشي.. والتفت عشان يروح للجازي لكنه لقاها واقفة وراه وحاطه يدها على جتفه العريض وتبتسم في ويهه.. فتدافع الحب العميـق اللي يحمله في قلبه لها من ازل الزمان.. ومعاه يتخالط الحزن ان يمكن هالانسانة يفقدها في يـوم.. فما كان منه الا انه يلمــها من جهة وحدة ويخليها تخبي ويهها في صدره الحنون.. وعيونه تحاول كبت دمع واظهار قوة عشان اربع من اخلص الحريم في هالعالم...

طلعت سرور من البيت قبل مناجر ابوها ويا حور وراحت لمكانها المفضل في العالم.. المطعم اللي ابوها جم مرة حاول يقنعها انها تفتح في وقت متأخر يوم الاحد.. وهي تتعلل له بجملتها العريـقة " يوم الاحد اهو اليوم اللي الناس تلتجي له الى المحلات العريقة اللي تقدر تخدم الناس بقلبها مو بدافع الكسب والمال.."..

كانت سرور تحمل في طيات ويهها ابتسامة دفينة وعميـقة من عمق الزمان وطوله.. ما كانت رشيقة مثل بطلات القصص الرومانسية.. او يمكن مثل خواتها.. كانت مليانة بشغف الضحك والابتسام الدائم.. صح ان وزنها يفوق ال70 كيلوو لكنها مليانة فرح ومو محتاجة للرشاقة عشان تخليها افرح.. وحبها للسكريات يتخطى اي حب او اي علاقة جنونية في هالزمن الغبي على حد قولتها.. تحب الطبخ والخبز واهم شي.. التزيين.. وتحلم انها في يوم تفتح لها محل خاص في كيك حفلات الزواج والمؤن الغذائية وخدمات الحفلات بمختلف مستوياتها واهميـتها..

وصلت الى المطعم واللفافة المزركشة على رقبتـها .. التفتت شوي وهي تتنسم من الهوا البارد اللي صدم رئتها بحلاوة ونقاء الثلج القادم.. وفتحت المحل ودخلت..

كان المطعـم مجدد من قبل اربعة شهور.. فاختلف الديكـور عن حالة السابقة وين ما كن عبارة عن حجيرة وحدة فيها اربع طاولات وكاونتر.. الحين صار يتكون من ثلاث حجيرات وكل حجيرة فيها خمس طاولات.. وبالاضافة الى بار صغير يقعد عليه شخص او شخصين مجابلين منظر نهر الهدسن والشارع والمارة.. وكانت حور تقعد عليه معظم الوقت اللي ترسم فيه في المطعم..

كانت الوان المطعم تتراوح بين الليلكي الناعم والفيــروزي العريق.. والصور للآلات العربية العريقة تغطي المكان.. بالاضافة الى راديو قديمـ حاطيـنه كنوع من الديــكور.. وصور من مزرعة الجازي وين ما تربت في حياتها قبل زواجها من علي.. ياما سألو البنات عن هالمزرعة لكنهم كانو دايما يخبرونهم انها صور خذوها من عند احد .. وانهم ما يعرفون شي عن احد..

كانت سرور اكثر وحدة تتسائل ان جان لهم اهل ولا لاء.. لانهم من وعوا على هالدنيا وامهم وابوهم وماما عايدة مجابليــنهم.. كونوا لهم اهل من الاصدقاء والزملاء والزبائن المعتادين..

حطت الجاكيت واللفافة على الشماعة اللي يم الباب وقعدت وهي تنتظر الكوفي اللي حطته على السخان تصب لها شي وتاكل وياه قطعة من الخبز اللي في الفرن المحتفظ بسخونته.. ويوم راحت للفرن تتأكد من الكيك اللي هناك سمعت صوت الجايلز الي عند الباب تعلن وصول احد.. فطلعت الصينية كاملة وطلعت من داخل.. وشافتهم ثلاثة.. بنت – والواضح انها بمنتهى الجمال- واثنين شباب بمنتهى الاناقة ولكن واحد منهم شكلـه مألوف بالنسبة لها ما تدري ليش..

سرور وهي تبتسم والغمازة العميـقة تظهر بكل حلاوة:..Good morning good people
حياة ردت عليها بمرح: very good morning actually
سرور عرفت انهم عرب ولكن بعد ما خاطرت انها تتكلم يمكن يطلعون هنود ولا شي: can I help you?? What would you like to have..
كايد أشر بيده بخجل: nothing for me
محمد اللي عرف سرور من غمازاتها لانه ما نساها ولا نسى معاملتها الطيبة وياه:.. انا ابي شي من الكيك اللي عطيتيني اياه ذيج المرة؟
سرور وهي مستغربة اول الشي بس بعدين ذكرت محمد:.. آآآآآآآآآه هذا انت.. انا اقول مو غريب علي هالويـه..
حياة وهي تضحك على محمد لانها فهمت الموضوع غلط: اكيد شفتيه على كفر مجلة new York society ولا شي ثاني..
سرور اللي ما فهمت لولا كلمة من اللي قالته حياة ردت بسذاجة: لاهو كان هني قبل جم يوم وكان يبي شي خفيف ويوم عطيتك الكيكة قلت لي ان عليك رياضة تسويها عشان تروح السكر.. صح؟
محمد وهو مندهش من ذاكرة سرور القوية:... ما شاء الله خوش ذاكرة..
سرور وهي تضحك بقوة:.. اذا ما ذكر جان تظيـع طلبات الناس..
محمد وهو ماخذ راحته وياسرور: بس عيل.. عطيني اللي عطيتيني اياه ذيج المرة..
حيـاة وهي متحمسة مثل محمد: وانا ابي شي حلـو مليان شوغر ومعاه كاباتشينو بالحليب..
سرور وهي تكتب الطلب وتنتظر من كايد انه ييطلبب: وانت متأكد ما تبي؟

لكن كايد كان سرحان وهو يناظر المكان.. وبالاخص الى اللوحة اللي على يمينه معلقة على الجدار بصورة المزرعة...

حياة ووهي تهزه من سرحانه:hello ارض الواقع يناديك..
كايد وهو منصدم ومنحرج شوي:.. سوري بس... الصورة عجبتـني..
سرور وهي تبتسم: ما تبي تطلب شي؟؟
كايد وهو يحس باصرار سرور : شي خفيف.. جاي حليب ولا كوفي بالحليب ووايد شوغر..
نسيم: comin in the way,,
محمد وهو منسحر باسلوب سرور: وايد طيبة وحليوة مووو؟؟
كايد وهو يبتسم له وحياة ترد عليه: اي والله .. وايد وايد وايد طيبة..
محمد وشعور غريب يطوف فيه تجاه سرور:. مادري ليش احسها... حنونة و..طيبة..
كايد وهو يمسك محمد من جتوفه ويضحك:you made your point وضحت رايك.. وايد طيبة ووايد حنونة.
محمد وهو يناظر كايد باستنكار : تحسني ابالغ..
حياة وهي تضحك ووتضرب يدها براسها: ياربي من هالريـال..

وكلها خمس دقايق ورجعت لهم سرور باللي طلبوه وكريمة الشوكولا على الكيك والكرواسون ساخنه وخلتهم يحسون بريجهم يسيل من الريحة الحلـوة..
سرور: house made and no fake ingredient
(صنع منزلي ومن غير مكونات مزيفة)
حيـاة: احلى شي..

كل واحد اخذ اللي له وبنفس الوقت دخلو كستمرية يداد ولكن كايد كان يتسائل عن الصورة المأخوذة لانها مألوفة بصورة فظيـعة:.. هالصورة تخص ممتلكات عائلية؟؟
سرور وهي اتناظر باتجاه للي يناظر له كايد: الصور هاي؟؟؟ لا والله.. الوالد ملاقيهم من عند احد.. وحطاهم كبارت من الديكور .. ولكن بسبب قدمهم هني في المكان نحسهم شي خاص بنا... مادري ليش.ز مع انهم صور
حياة ووهي تبتسم بحلاوة: اكيد مع العشرة الاشخاص والاغراض تصير جزء من ذاكرة الانسان وخصوصياته...

حس كل من محمد وكايد ان كلام حياة مبطـن او يمكن موجه الى ضمـير وعقل كايد.. الا انه رفضه بحجه انه ما يطلب شي اكثر من صداقة شريفة مع حيـاة..

انصرفت سرور الى خدمه الناس اللي دخلوا ومحمد ما يقدر يشيل سرور من عيونه.. يحسها مقياس للطيبة وللحنية في العالم.. غريبة ان اكووو ناس بمثل هالطيبة.. محمد معاني من نفس معاناة سرور.. التغرب وانقاطع صلاة واواصر العائلة.. الا ان محمد يعرف بهالعائلة على عكس سرور اللي تربت على فكرة ان امها ووابوها مقطوعين من شير..

تم كايد يناظر في الصـور وهو يحاول يطابقها بمزرعة ابوه الا ان ماكو اي مجال للمقارنـة.. كايد نفسه يعرف ان ابوه على خلاف مع عمته الوحيـدة بالعالم.. الا انه ما يعرف هالعمة من تكون والا وين راحت والا شنو صار بحياتها.. كل هالامور تعد من الضبابيات اللي تجتاح حياتهم كلهم عيال الجيـل اليديد من بعد جيل علي وحارب والجازي..

وكلها دقايق وينهز المكان بدخلة بنت وكانها قطعة من الجمال بغضبها المتقد... ووراها البنت اللي ما تخلت عن مخيـلة كايد ولا لحظة من اول ما شافها وتتبعها البنت اللي ترافجها..

حور وهي تسحب يد بدور: خذي جيسج ولا تتكلمين
بدور وهي تلتفت وويهها اشبه بجمرة متقدة من الغضب: لا تتجرأين وتلمسيني. وخذي هالجاكيت لج ما بيه
حور وهي مندهشة وتحاول تسكت اختها عن الفضايح: تعالي وياي ورى..
بدور: مابي برد البيـت..
حور: يعني شفيه الجاكيت (تطلعه من الجيس والوانه الباهية الزاهية ما تنطبق على شخصية بدور) آخر صيحة واخر موضة..
بدور وهي تحط يدها عند راسها: كفاية لونه اللي يخليني ادووخ..
حور: خذيه ولا تسوين لي مشاكل..
بدور وهي تخبي يدينها ورى: مابيه وانا بررد البيت..
حور: ما بتردين البيت الا وياج ...
بدور: مابي..
حور: يودي..


الا وبحور تسحب بدور معاها الى ورى الكاونتر ومن غير قصد تضرب ذراع كايد بقوة لدرجة انها فقدت توازنها.. تلاقت عيونها بعيـونه بحرج واضح اما كايد فما كان مصدق ان صدف القدر جمعتهم الى هذي المحطـة..

نسيم عرفت كايد على طول اما حوور اللي ما انتبهت له الا هذي المرة ضاعت في ملامحه وفي حياها وغضبها من بدور اللي عرضها لمثل هالموقفف:... انا اســفة. (شدت على عيونها وكانها تتدارك نفسها) I'm very sorry
كايد وهو يحاول يرد عليها بالكلام الصحيح لانه اهو الارتباك ركبه من راسه لريله:.. لا عادي.. اتس اوكيـه...

حنت حور راسها بعلامه احترام وسحبت بدور بقوة الى ورى الكاونتر وداخل المطبـخ..

اما حيـاة فناظرت البنات بقرف وكانها منزعجة منهم: what a brat
(صج وقحـة)
محمد وهو يشرب من الكوفي: مب قصدها..
حياة: شنو مب قصدها.. جذي يسوون فوضى في مكان عام؟؟؟ قلة ادب وواحترام..
نسيم تحركت من مكانها من بعد ما سمعت كلام حياة الحقير وتوها بتدخل المطبخ الا تلتفت الى كايد وتبتسم في ويهه بسذاجة:.. hello ( تتمتم شي بحلجها) we are very sorry

ابتسمت بعذوبه وناظرت حياة بحقارة ودخلت المطبخ.. اما حياة ففتحت ثمها من الصدمة ومحمد ضحك شوي.. لكن كايد ظل مرتبك من اصطدام حور فيه ومن قربها الواضح منه.. وكأنها شي خاص فيه.. قطعة منه ضائعة من زمن طويـل.. يحس بالاشتياق له وكان هاللحظة كانت عبارة عن التعويـض... هل هذا هو شعـور رومانسي من مشاعر العرب.. والا هاي فطرتك يا كايد نحو بنت عمتك الوحيـدة..

يوم كملوا الللي ياكلـونه دفعوا بقشيش استلمته منهم سرور وهي تعتذر: انا ووايد اسفة على الموقفف اللي صار.. بس هذول خواتي الصغار وتعرفون اي نوع من المجادلات بين الخوات تصير..
محمد بحبابة تصرفاته: لا عادي بالحل مهما كان... هذول صغار.. بس ان شاء الله تصالحو؟؟
سرور وهي ترفع حواجبها وتضحك بصوت متحمس: اذا تصالحوا معناته ان فلسطين لها امل بالتحرر..
حيـاة بصوت مصطنع: شكرا الكوفي كان حلو..
كايد وهو يشكر سرور بعاطفة كبيـرة تنتابه: مشكورة وعساج عالقوة.. ياختي..
طالعت سرور كايد وهي تحس بالحنية تجاهه وابتسمت له بصدق:.. الله يقويـك.. ياخوي..

مشى كل من كايد ومحمد وحياة وطلعوا من المكان.. وبطلعتـهم وصل علي ويا زوجته الجازي اللي تمت تمشي وهي ماسكة يد زوجها وبنتهم الصغيرة تمشي جدامهم بمرح مشهود له... وعيون كايد عليهم بالتهام مخيـف .. شي في ويه الأم والبنت الصغيرة خلى كل من ابوه وعايشة اخته يطلعون جدامه.. وشي في ويه الريال اللي مغطي الشيب راسه على الجوانب رجع له ويه حور الحماسي..

اول ما يات على باله حور شافهها طالعة من صوبهم .. وقفت شوي تطالع ابوها وامها اليايين وما كان منها الا انها تسلم بسرعة وتمشي ويا ارفيجتها اللي كانت عيونها على كايد ويوم انتبهت لحياة اللي تناظرها باحتقار طلعت لها لسانها اللي انخرق بدبوس فظي ولوعت جبد حياة.. يوم مشت حور ويا نسيم التفتت بسرعة الى وين ما المطعم وشافت عيون الريال اللي ضربت فيه اليوم بالغلط تناظرها وكانها تخترق روحها.. فالتفتت لها هالمرة وبصورة اطول من قبل.. وكانت عيونه ما زالت عليـها.. خافت حور من نظراتها وسرعت من خطواتها ويا نسيم .. بعيدا عن مطعم ابوها.. وبعيدا عن عيـون هالمراقب..