(حمران النواظر) **انــتي وانا.. (مذكــرات أم)**

إنـتي وأنـــا مذكرات أمــ

بناتي.. اربع.. جهاتي كلها..
يميني سرور..
وشمالي حور
.. وواجهتي قوة بدور..
وعلى ظهري خفة ظل نور..

اهديــكن يا بناتي.. هدية من عمري.. مذكرات.. تذكروني من بعدها وما تنسوني

انــتي وانا.. (مذكــرات أم)

تغادر القصص.. لتحل محلها قصص جديـدة... وها هي اوراقي تتصدر نفسـها لتكون السباقة في خط الحروف والاسطــر لمنحيات حياة جديدة..


حســـنا..

اتعتقدون ان العائلة مبدأ مهم؟؟؟؟

حقا... ألم يبادر هذا السؤال في بالكم؟؟

الأب.. الذي يتحكم بكل شي.. ويقرر من يذهب ومن يبقى.. من يتحرك ومن يسكن.. ومن ينال ومن لا ينال..

الأم... التي احيـانا تفرق في حب اخ عن اخ.. لا برغبتها.. وانما.. لاسباب تخصها وترجع لها...

الاخ... الذي كلما تراءى في نفسـه.. يمد يده.. ليضرب.. او ليسلب دمية احد او سكاكر احد..

الاخت.. التي تتعالى ان كانت كبيـرة.. وتنافس اذا كانت صغيـرة..




تعلـمون...


نعم..

انها مهمة.. وتستحق كل ما يمكن بذله في هذه الحياة لتكوينها.. وايجادها.. وتنشئتها..


هذا هو المبـدأ في قصتنا الجديدة.. فهي تتكلم عن عائلة من اب وام.. واربع فتيات..


ستتبادر لأذهانكم القصة الكلاسيكية.. نساء صغيرات.. فلا انكر.. قصتي مستوحاه من هذه القصة.. ومن قصة حياتي.. مع اخواتي الأربع الكبار... على الرغم اني املك اخوات صغيرات.. الا انني اجد حياتي كلها تتمحور حول اخواتي الاربع... وامي.. رغعنتنتتةتة | \واخي الكبيـر..

اتمنى من البارء.. ان تنعجبكم.. لانها تمتلك من الحزن.. ومن الحب.. ومن الفكااهة.. ومن الابتسام.. ومن الصلابة...

تتكلم عن العلاقات وتتكلم عن صلات الرحم... وتتكلم عن الحب من اول نظرة.. وحب.. من اخر نظرة...

----------------------------------------

مقدمة تلقيـها لكم بطلـة القصـة الأولى الجازي.. زوجة وابنة واخت وام وعمة..

الأيام.. كيف تعدي على ذاكرة الإنسان وتبين له انها مجرد حلم.. تكونفي غمضة عين ولا رمشة جفن.. سهلة مرورها الايام.. لكن ما اصعب اجتياز الانسان لذكرياتها.. يعيش في غربة نفسه.. الى ان يجبر على غربة وطنه او ابتعاده عشان يهرب منها.. الا انه يدرك انها عالقة في دهاليز دماغة اللي ما يقدر يفسرها او يترجمها او يعالجها كانها معلومة مدخلة الكترونيا.. يعرف ان هذي الامور عبارة عن حبل يسحبه شوي شوي الى الماضي.. وخصوصا اذا كان هناك بعض الأعمال "الغير منجزة" يحاول يهرب.. يتناسى يتحاشى يبتعد يضحك يسخر.. لكن.. تهاجمه الوحدة.. وسط الجموع الغفيرة وتذكره.. يا انسان.. لك شي من الماضي.. باب فتحته.. محتاج منك انك تغلـقه .. فمتى راح يكون هذا الموعـد؟؟

وتبدا عملية الأنتظار.. لشي.. لمعجــزة.. لموهبـة.. لضربة حظ.. ترجعك الى ماضيك.. تواجه الأبواب.. وتصارع الريح والرياح الهوجاء في سبيل اغلاقها.. وطول ما انت تتعذب عشان النهاية السعيدة.. تتخلل لك ال4ياء الفرحة والمرحة اللي تشجعك.. والاشياء اللي تحبطك وتمسك يدينك عشان لا تواصل..

بدل ما تقعد تفكر شنو اللي كان من الممكن يصير لو انا مثلا مثلا مثلا كذا كذا.. شرايك لو انك تغووووص في الأعمال " الغير منجزة" ما تظن انك من الاحسن لو انك تجرب.. بدل لا تفكر؟؟؟

دعــوة هذي القصة الى كل من ترك مجال مفتوووح او حلم شبه المكتمل ولا رغبة متأججة اخمدها بالمصاعب والمستحيــلات.. يمكن هذي هي اللحظة اللي انتو تنتظرونها.. لان في كل دقيقة تمر.. 60 ثانية.وكل ثانية تعبر عن فرصة يديدة.. فتخليــتوا عدد الفرص اللي جدامنا……

-----------------------------------

أبطــــال القصــة

عائلة حارب بن سالـم

حارب: الأب.. اخ الجازي..
فاطمــة:.. الزوجة الثانية وام عبدالله..
كايد:.. الأبن الوحيد من الزوجة الأولى المتوفاة (الجوهرة) بطل القصة.. وله من العمر 27 سنة
عبدالله:.. الابن المدلل والمفسـد.. وله من العمر 23
موزة:.. ابنة واخت وعاشقة ولها من العمر 19
عايشة: اخت ولها من العمر 16\

------------
7 ة
عائلة علي بن مانع

علي: الأب.. عمود وصارية السفينة...
الجازي:.. اخت حارب المبعدة.. وام ملائكية لاربع بنات..
سرور: الابنة الكبـرى.. قمة في السعادة ووزن زائد.. تبلغ من العمر 25 سنة
حور:.. تمرد.. ووقاحة. بقلبب طيب.. واسف لذيذ.. تبلع من العمر 22 سنة (البطلة الأولى)
بدور:.. قوة نسائية.. واحتقار للرجال.. نتيجة الفكر الممتد والعقل العلمــي.. النسائي.. تبلع من الع=\7مر 18 سنة
نور:.. طفولة ودلع.. دلال وولع.. تبلع ن العمر 12 سنة
ماما عابدة:.. ام ثانية.. وجرعة زائدة.

حوخ من الحب والاهتمام..

-----------------

حسن بن فلاح...

حسن : الأب.. عربي متغرب.. تاجر كبيـر.. ذو قلب اكبر..
فيــروز:.. زوجة لطيــفة.. وسليلة عائلة ثرية باكســتانية..
حيــــاه:... جمال آخاذ.. وحدة في الذكاء.. (البطلة الثانية) تبلع من العمر 25 سنة
جميـــلة: اخت معاونة.. ولكن غيورة تبلع من العمر 23 سنة..

-------------------

عائلة الأميـــر الفيصـل بن جاسم

الأمير الفيــصل:.. اميــر مبعـد.. ومتمســك بعراقته واصالته.. والعائلة اولى من الغرب.. (ما بقول من اي مملكة او اي اسرة مالكة منعا للمشاكل)
محمــد:.. الابن فاقد لكل ملذات الحياة.. الا من صداقة كايـد.. يبلغ من العمر 26 سنة
العنود: بنت العمـــ المحيـرة له.. محيرة لانسان ما تععرفه ولا تدري عن هوا داره (محمد) ممتعة وظريفة.. تبلغ من العمر 22 سنة
الهنوف:.. والدة العنود واخت الفيـصل.. شديدة التسلــط.. وشديدة الطموح.. والانانية..


وباقي العائلات والشخصيات تأتي في سياق القصة..

اتمنى لكم قراءة ممتعة.. والجزء اليديد راح يكون بليلة السبت ان شاء الله.

وللي رجاء منكم... على قد الكمية اللي اقدر انزلها اتمنى عليكم قبولها من غيــــر اي مطالبات.. ترى عندي خطة حلوة ومحكمة للقصة... اتمنى منكم تستمتعون بكل لحظة فيها..


لكم مني اجمل تحية...


حمران النواظر...





تنويه من الكاتبه (حمران النواظر)

انوه في بداية القصة ان الجنسية غير موجودة.. اهي عربية.. لكن مالها وجهة معينة في بلد معين فاتمنى منكم عدم التكهن او محاولة الحزر بمنطقة القصة.. منعنا للمواجهات اللي انا بغنى عنها.. احب اخليها بلا جنسية الا اذا تمنيـتوا تخلوها ضمن مواطن قلوبكم..

مرحـــــــــبا

تزايدت امطار النهار.. وتحول الضوء الى ظلام بعيـون الجازي.. طلعت قبل نص ساعة من العيادة وما تدري وين تتوجه.. ظلت تمشي وتمشي لمن وصلـت الى احد الباركات المفتـوحة.. ولاقت نفسـها منجذبة الى هذاك المجال الواسع الخالي تقريبا من الناس.. جذبت نفسـها من البرد المسيطر في المكان.. واكثر شي الرطوبة.. وتحركت لداخل البارك وهي تحس بقطرات المطر تتهادل على مظلتها..

اسودت الدنيا بعيـنها بصـورة غير طبيـعية.. وفجأة بين لها الصبح السعيد حزين ومؤذي.. وكل شي يعبر عن الألم.. ما لقت نفسها الا قاعدة على احد الكراسي الحجرية وهي ماسكة مظلتها ودمعتها جارية على خدها.. وفي مخيلـتها شريط الذكريات من صباها الى هذي اللحظة.. بناتها.. وفرحتها.. وزوجها.. وقصة الكفاح في ارض غريبة عليها وعلى زوجهـا..

في شهور راح ينتهي كل هذا:؟ .. معقول؟؟ ابتعد عن علي.. وعن بناتي.. غصبن عني..؟؟؟ بعدني ما تمتعت منهم.. بعدني مافرحت بهم...

بانت في دموعها ضحكة سٌرور المليانة.. وتمرد حور الجميل.. وذكاء بدور العنصري.. وحلاوة روح نور الصغيـرة..
والاكثــر.. سيد حياتها.. وحبيب قلبها.. شعلة تمردها.. وصديقها على مر هالزمان كله.. عـلي..كيف راح تقدر انها تبتعد عنه.. كيف انها تتخلى عن احلامهم وامنياتهم وحياتهم الجميلـة..
سحبت انفاسها بصعـوبة وهي تذكر ان حفلة نور تبدى بعد دقايق.. واهي بعيدة عن ذيج المنطقة واكيـد نور الحين قلقة وتنتظر.. شدت على عمرها الجازي وقامت من مكانها.. وكلـمة السرطان ترن في مخيـلتها مثل الجرس.. واي جرس.. جرس انذار.. يبين لها ان هذي هي نهاية حياتج.. ونهاية امنياتج.. ونهاية كل شي جميل مر في حياتج..
حملت نفسها على المشي لحد ما توصل الى احد المحطات عشان توصل لمدرسة نور..

وفي الدرب وهي تمـشي كانت ساهيـة.. وهي تفكر بكلام الدكـتورة.. كيف ان السرطان تفشى في عنق الرحم.. وصار من الصعب انهم يتحكمون فيه.. وشلون اهي بحاجة الى علاج كيميائي عشان يقدرون يبطئونه.. وكل ما بمعناه انهم يأخرون المحتم..

دخلت القطار وهي تحاول تبعد كلام الدكتورة عن بالها وتفكر في حياتها.. وفي ماضيها.. وفي خطاها اللي خطتها عشان توصل لعلي وتوصل الى اميـركا معاه.. ومع هالذكريات تذكرت اشياء تحاربها وتصارعها من بداية حياتها الزوجية الى هذي اللحظة.. عائلتها في الشرق.. واهم من في هالعائلة.. اخوها حـارب..

شهقت بتصاعد في حنجرتها.. وابعدت صورته الشابة عن بالها.. وحاولت انها ما تذكر اشياء تبعث في نفسها حزن اكبر من اللي اهي فيه.. وحطت في بالها انها على وصول لمحطه بنتها.. ولازم تكون بفرحة عامرة عشان خاطر نور لانها كانت تعد لهالحفلة من فترة واهي وخواتها كانو يساعدونها ..

----------------------

وصـل كايد الى الشقل ويرن تلفونه عند باب البناية اللي دخلها ورفعه.. وبالطبع كانت المتصلة اهي حياة..

كايد: ها حياة؟
حياة وهي تحس بالعجز: كايد ساعدني..
كايد وهو يتهفهف: شنو الحين بعد؟ الجوتي ما يصلح؟؟ ولا الصندل ستايله قديم
حياة: لا الصندل اوكية.. بس عيبه انه من الساتان.. يعني ما يصـلح الى حفلات جذي؟؟
كايد وهو يهز راسه: وانه شعرفني بهالسوالف يا حياة.. (يكلم جانيت موظفة الاستقبال) good morning jan
جانيت: good morning kayeed
كايد: is the prince here?
جانيت: no he didn't show up today.. he has a convention in long island
كايد وهو يتذكر هالشي لانه من المفروض يروح وياه ومحمد كالعادة ما راجعه لانه يتكلم مرة وحدة: ohh.. That's just great… thank you jan
جانيت بابتسامة: u are most welcome..
رجع لحياة على التلفون: حياة انه باخليج الحين
حياة وهي منقهرة من تصرفاته: كايـد.. اشفيك؟؟ انت اللي قلت لي بساعدج في هالسوالف
كايد وهو شوي يفقد اعصابه: حياة بليز مب الحين بعد شوي.. واذا تبين مساعدة اتصلي في كايل على الاكستنشن 454 وبيساعدج..
حياة: ثانكس بت نو ثانكس.. بشوف بروحي ان جان اقدر ادبر عمري.. لكن انت... you are a bad friend
كايد وهو يبتسم: من زمان مب من اليوم..
حياة وهي تبتسم: بس مالي بد عنك.. يالله تيك كير..
كايد:وانتي بعد.. باي..

سكره من غير ما ينتظر منها باي واهي تعودت عليه جذي.. تمت واقفة وهي تناظر روحها في المنظرة الكبيـرة في محل الاحذية الكبيـر.. لمن ياتها جميلة وارفيجتـهم رجاء..

جميـلة وهي مشمئزة: لازم تبتعدين عن هالانسان يا حياة.. ما منه فايدة..
حياة وهي تناظر جميلة باستخفااف: من منه فايدة عيل؟؟؟
رجاء: جميلـة ما عليج منها خليها على راحتها..
جميلة تكلم حياة بطريقة هادئة ولكن مؤنبة: يعني في اكثر من مناسبة بين لج انه not ready for any thing
تقاطعها حياةة: ومن قالج اني مستعدة لاي شي مع كايد... هو صديقي مو اكثر..
جميلة وهي تناظر حياة اللي عطتها ظهرها: حطي عيني في عينج وقولي هالكلام..
حطت عينها الرائعة في عيون اختها: جميلة ارجوج.. Not now.. not here
رجاء وهي تمسك الثنتين: انتو اللي مب هني ولا هالوقت.. عندنا شوبينغ نخلصه.. ليله باجر الملجة ولا نعرف شنسوي.. يالله حياة يالله جميلة انسو كل شي وخلونا نكمل..

طالعو بعض الاختين وابتسموا.. وانطلقوا في باقي رحلة التسوق العالمية .

---------------------

البريك المدرسي في ثانوية بدور.. وما افظع هالفترة على قلبها.. اكثر فترة توحي بالملل ووالاشمئزاز.. صح انها في مدرسة داخلية ابوها وامها صرفوا عليها دم قلبهم عشان يدخلونها الا انها تحس بالملل فيها.. بنات العائلات الكبرى والطبقات الراقية وخصوصا العرب في حالة من الشلل الدماغي على حد قولها.. كل وحدة منهم تهتم في ظفرها اكثر من بروجكت الجامعة.. والاكثر قهر انها لازم تنضم لوحدة منهم في هالبروجكتات وين ماهي تصرف دم قلبها وتحصل الA ومعاها بنت العايلة الغنية..

IT'S NOT FARE هاي اللي يمر في مخيـلتها.. لكن شتسوي.. اهي مضطرة عشان تلقى لها رسايل توصيات ممتازة من اساتذتها عشان تدخل احسن جامعة في البعثة الدراسة الضخمة اللي تتوقعها.. وبجذي بتقدر انها تخفف العبء اللي يحملها كل من امها وابوها..

غرتكم بدور... انصحكم بلاء. لانها بعدها ماطلعت على جلدها الحقيقي.. بدور اكثر عنصرية جنسية في هالزمن.. تكره الرياييل.. وتفضل النساء.. وعندها المرأة اعظم ما خلق الله.. وكيف ان فكرة الLIP GLOSS خطوة تراجع في عالم المرأة.. وكيف انها لازم تكون مشغولة في البحوث العلميـة والتفكيـر الفلسفي والحياة العملية من غير التفكير في الحمل او انجاب الاطفال او حتى ادارة العائلات.. المرأة ببساطة في فكرها انخلقت عشان تحكم العالم.. واهي ما تعرف ان المرأة بالفعل بانجابها للاطفال وادارتها للعائلة تحكم العالم وتنشأه..

يات لها صاحبتها في المدرسة.. طبعا بدور مو من النوع اللي يحب يكون علاقات في المدرسة لكن هذا ما يمنع من الزمالة والصحبة في المدرسة.. وهذي البنت اسمها تامي لي..

(الحوار مترجم للعربي)
تامي لي: هاي بدور .. شمسوية؟
بدور وهي تلعب في الأكل اللي ما يعجبها لانها منتجات لحومية وهي نباتية:.. مثل الأول.. وانتي؟
تامي لي بزعل: خايفة شوي من امتحان باجر.. علم المثلثات صعب علي وما يناسب بشرتي هههههههههه
بدور وهي تحس بسخفها: درسي له زين وما بيصعب عليج..
تامي لي:.. مادري شلون تقدرين تعيشين حياتج جذي.. حبج للدراسة .. (وهي تحاول تدور كلمة مناسبة).. مثـير للكآبة..
بدور وهي تتجتف وتجابل تامي لي:.. وشنو اللي مثير للفرحة بنظرج؟؟ اخر صبغة مانيكيور ولا كونسرت لgreen day ؟
تامي لي وهي متحمسة للفكرة الاخيرة:.. بالضبط.. هاي الاشياء البنت لازم تكون منشغلة فيها.. لازم نستانس بهالعمر.. ولين كبرنا يهتمون رياييلنا المستقبليين بالامور المملة مثل الشغل والراتب الشهري والاكل في الثلاجة؟
بدور وهي ما تصدق مدى غباء وسذاجة تامي لي: وشنو المفروض منه نسويه في المستقبل؟؟؟
تامي لي: لا تستخفين بالموضة يا بدور.. تراها عالم ناس يتعبون فيه عشان يكونون الافضل.. عيشي حياتج (تغمز لها) من يدري.. يمكن يعجبج الوضع...باي..

قامت تامي لي وبدرو تناظرها بغير تصديق.. زفرت بقوة وحملت صينيتها وتوهابتقوم الا في ويهـها احد الطلاب العرب اللي يظايقونها في المدرسة.. متخذين الطابع الاميـركي في الاخلاق المنحلة والاداب المفقودة...

اسمه كان جبر..

جبر: hello pretty woman
بدور وهي تناظره بطريقة مزدرية: اكثر من مرة قلت لك لا تعترظ طريجي..
جبر وهو يتصرف بطبيعه جذابة نظرا لوسامته:.. لا تغترين.. انتي واقفة في درببي لسوزان (يطالع البنت الجميلة اللي وراها وهو يغمز وهي تناظر للاتجاه اللي يطالعه وانحرجت شوي لكن ما همها هالشي) بعدين.. من يقدر يقاوم سحر نظاراتج الdouble impact
بدور: get lost
جببر وهو يلتف لها بعد ما مشت عنه: eat your heart out double impact..
ارفيجه زيد: ليش تظايقها.. خلها تولي..
جبر وهو يطالعها بابتسامة شريرة: .. مو قبل ما تطلع من هالمدرسة..
زيد: وبتطلع لانك تظايقها؟
جبر وهو يمسك رقبه ارفيجه بقوة:.. وليش؟؟ تظن اني ماقدر اسويها فيها؟؟؟ لا تعلي نفسها على احد.. اهي بشر مثلنا مثل كل الناس.. لا تعامل الناس بفوقية..

ومشى جبر الى طاولة سوزان وربعها.. اما زيد فتبع بدور الى وين ما راحت.. لقاها عند اللوكر.. ووقف بعيد عنها شوي..

انتبهت له بدور وكشرت بويهها: شنو الحين؟ ياي تكمل الحفلة انت؟؟
زيد وهو يبتسم بطيبة: لا.. ياي اعتذر منج على تصرفات جبر؟
بدور وهي تفتح اللوكر وتطلع اغراضها منها:.. تعودت عليه.. ومطنشته..
زيد وهو يحوس بعيونه بتوتر: بس انتي ليش مغرورة جذي بدور؟؟
بدور وهي تناظره بطريقة تعبر عن الملل: انه مب مغرورة؟
زيد ووهو ويتراجع: صج؟؟؟ ماظن.. لان تصرفاتج تعبر عن الغرور relax انتي انسانة مثلنا كلنا.. لا تعتبرين نفسج freak

وراح عنها زيد وظلت اهي تناظر خطواته بقهر.. من يسمح لهم بهالتدخل اللي محد سامح لهم به.. مغرورة؟؟

بدور وهي تكلم نفسها: اذا بعدت نفسي عن اشكالكم اصير مغرورة؟ اذا ابي اطور نفسي صرت معقدة... Typical act

طلعت كتبها وانتظرت من الفترة الاخيـرة انها تنتهي وتعدي على خيـر..

----------------------------

يتبــــــــــــع

الصبـح في الشرق.. وحوالي الساعة ست ونص الصبـح نزلت موزة من على الدري وهي حاملة مكبس البخور وتوزع ريحته على ارجاء المكان.. وصوت القرآن يصدح في زواياه الرخامية.. تمت تمشي وشعرها الطويل يقطر منه الماي .. وهي تمرر الريحة وبحركة يدها تضرب الاساور الذهبية العريضة ببعضها محدثة الصور الجميل للمجوهرات.. تسمي بالرحمن بكل توزيعة بيدها.. يمين وشمال وجدام وورى.. لمن وصلت الى ارضية الصالة اللي تعتبر اخفض منطقة في البيت بتصميمها الرائع.. حطت المكبـس على الطاولة ورجعت خصلاتها الى ورى وركبت الدرجات وصولا الى المطبـخ الداخلي.. لقت فيه الخادمة تزهب الجاي اللي ريحته صدحت في المكان..
موزة:.. جونا جهزي الريوق بابا بينزل الحين..
جونا بابتسامتها الرقيقه: اوكي ماما موزة..
موزة ووهي تطلع بعض الاغراض من الثلاجة: بابا عبدالله يا امس؟؟؟
جونا: يا اليوم الفير ماما.. ويقول يبا انته ماما يوقظه االساعة عشرة يروح مزرعة..
موزة وهي تهز راسها عجب من اخوها:.. هاي عبدالله دومه في هالمزرعة ما عمره فكر انه يروح الجامعة ولا معهد يدرس فيه.. الله يعين ابوي عليه والله... زين جونا طلعي عصيـر وخلي فيه ثلج وجرشيه في الآله.. اوكي؟
جونا: ان شاء الله ماما...
طلعت موزة من المطبـخ وهي توقف عند احد المرايا الكبيـرة المذهبة على الجدار.. لفت شعـرها الطويـل ودخلته على بعضه عشان يثبت.. وهزت جلابيتها عن قطرات الماي.. وقفت شوي في الصـالة وراحت من بعدها لتحت الدري وين ما غرفه عايشة اختها تصيـر..
موزة.. بنت في منتهى الجمال والادب والاخلاق.. اللي يخليها محط انظار كل ام تتمناها لولدها.. الا ان ابوها عمره ما رضى يزوجها لانها بعدها صغيـرة.. وشي فيها يذكره باخته الجازي اللي راحت عن نظره من قرابة 25 سنة.. فظل يحاول يخليها تحت نظره وتحت حمايته لانه حتى بوجود امها .. الا ان موزة تغطي بحظورها عن الكل.. وحتى عن غياب ناصـر..
دخلت موزة الغرفة ولقت عايشه قاعدة على كرسيها المدولب لابسة ملابسها بس قاعدة تلم شعرها الحريري الضعيف
موزة وهي تتزاعج وياها:.. عايشة؟؟ ليش زهبتي بروححج اليوم؟
عايشة وهي تبتسم:.. ما فيها شي.. علبالج انه من صج مقعدة ماقدر اتحرك.. واليوم صابني نشاط وتحركت وياه..
موزة وهي تمسك شعر عايشة بلوم جميل:.. لكن انتي ناسية انج لعبتي اللي البسها وارتبها وعدلها؟
عايشة وهي تضحك: وبظل طول عمري لعبتج يعني؟؟؟
موزة وهي تلم اختها من ورى وتناظره في المنظرة:.. اي.. عندج مانع؟
عايشة وهي تخفس ملامحها شوي:. مانع ولا دواس؟
موزة وتضربها على جتفها: مالت عليج..
عايشة: ههههههههههههههههههههههههه...
ولمت عايشة شعرها وربطته بالكليب الخفيف وزهبت..والتفت بكرسيها الى موزة الواقفة بجمالها العريق..
عايشة: شفتي؟؟؟ اقدر التبس واقدر اتعدل بروحي؟؟
موزة وهي تدقق فيها: اي والله ما شاء الله عليج.. جنج اللعبات اللي يعرضونها في سبيس تون.. اتعدل بروحها.. تصيح بروحها وتسكت بروحها.. خوش شي تتطورين مع الزمن ههههههههههههههههههههههه
عايشة: هاهاهاها... ويا هالويه.. وينه ابوي نزل ولا لاء..
موزة: خلينا نطلع نشوفه ..
وهم طالعين من الغرفة..
عايشة: عبدالله هني اليوم ولا؟
موزة: لا هني ووموصني جونا انها تخبرني عشان اوقظة الساعه 10
عايشة: يوما ما بينقلب بغل هالصبي..
موزة: ههههههههههههههههههههههه وليش اهو مب حصان؟
عايشة: ههههههههههههههههههههههههههههههههههههه
ولقوا ابوهم قاعد على طاولة الأكل اللي كانت في زاوية مسيـجة مثل الحديقة الصغيـره.. يشرب في جايه وأهدابه الطويلة منخفضة تناظر في الجريدة اللي جدامه.. وغترته ملفوفة بطريقة محترفةعلى راسه.. فسكتن البنتين وراحو لعند ابوهم بسكوت الا انه انتبه لهم ولضحكاتهم ككل صبح..
ووجه لهم تحيته من غير ما يناظرهم:... اشوف ملكات جنتي صاحيات ؟؟
عايشة وهي تقوم من الكرسي ببطئ وتقعد على الكرسي: يبا السموحة منك يعني بس انت ما مليت من هالجملة؟؟؟؟
حارب وهو يناظر بنته بطريقه تعبر عن الشخصية الأخاذة:.. اي جملة بالضبط يام لسان انتي؟
عايشة وهي تناظر ابوها:.. يعني هاي.. ملكات جنتي.. من يوم واحنا كبر الزيتونة وانت تقول لنا جذي؟
حارب يطالع موزة اللي واقفة عنده وهي تبتسم: انا ابي اعرف هاي من وين لها طوالةاللسان..
عايشة: يبا.. انا قلت لك السموحة.. مو قصدي شي ترى.
حارب وهو يناظرها بحب كبيـر في عيونه:.. شوفي.. انتي وهذي.. بتمون ملكات جنتي.. من يوم كنتو كبر الزيتونة.. لليوم.. لحد باجر.. يوم الشيبات تطلع من مخكم...
عايشة وهي تتهكم اكثر: خوش مستقبل.. الشيبات تطلع من المخ.. ابشري يا موزة فشعرج هاي بينقلب صفحة بيضا
ضحك كل من حارب بخفة وموزة ..
موزة: شلونك بوناصر ؟؟ عساك ابخير؟
حارب: بخير يا مال الخيـر.. يلسي وخلينا ناكل .. والا تعالي؟؟؟
عرفت موزة ابوها شبيسأل عنه:.. لا تحاتي.. يا البارحة.. وراقد في داره.. ويبينا نوقظه الساعة 10 عشان يرجع المزرعة..
حارب وهو يهز راسه: انا مادري شلي عاجبه في هالمزرعة؟؟؟
عايشة: وشنو اللي ما يعجبه فيها.. ليمون وشير وماي وتراب وطين... انا لو الودي ودي نعيش هناك..
حارب وهو يذكــر الماضي الجميل وين ما كانت الجازي تعيش في ذيج المزرعة وياه وويا يدهم ياسين:.. الله يرحم ايام المزرعة... وين ما كنا نعيش فيها.. وريحة الليمون لحافنا في ببرد الليل.. وسكرة الصبـح..
موزة الي قعدت وفرحت بالطاري اللي يابه ابوها:.. ابوي.. شرايك لو نروح هالاسبوع؟؟؟ من زمان ما قعدنا هناك.. وماكو الا عبدالله اللي مستحلها..
وبصـوتها الرنان اللي طغى على المكان الوسيـع والفاظي دافعت عن ولدها: شفيه عبدالله؟؟ وليش ما يستحــلها يعني؟؟ مب حلال ابوه ولا عرق جبين ايداده؟؟؟
سكتت موزة وبلعت ريجها بصعوبه وحارب ما كلف نفسه حتى انه يلتفت ولكنه رد على مرته بصوت احد من صوتها ولكن بهدوء..: محد قال شي عن قرة عيـنج.. كل اللي قالوه انهم يبون يروحون المزرعة؟
وسكتت فاطمة.. وهي تمشـي بخيلاء واضح.. حرمة في عمر الخمسين الا انها تمتلك شباب اللي في الثلاثين.. جمال عربي اصيـل واخاذ وبشره متماسكة ولكن كل هذا غلاف لعجزها وقبحها الداخلي.. عمرها ما تبادلت كلمة حب ويا حارب.. وعمرهم العيال ما شهدوا مشهد من مشاعد العاطفة بين اب وام.. كل اللي تجابلوا فيه اهو الاتهامات المتبادله.. والتفرقة الواضحة بين الاولاد.. يمكن لكونها الزوجة الثانية لحارب حست بالغيرة من حرمته الاولى اللي توفت من بعد ولادة ولدها في حادثة مؤسـفة..
قعدت فاطمة على الطرف البعيد من الطاولة وصار حارب مجابلها من غير ما يناظرها بعينها.. ونادت بصوتها على جونا:.. جونا.... ييبي لي جاي ..
عايشة تبتسم في ويه امها: صبحج الله بالخير يا طويلة العمر..
فاطمة تناظر بنتها بابتسامة حنونة:.. صبحج الله بالنور.. ها يمة زهبتي للمدرسة؟
عايشة: ايه وانتظر الاميـرة موزة تزهب عشان نروح رباعه ويا السايق..
فاطمة:.. لا اليوم بتروحين وياي.. باخذ السايق عندي زيارات اليوم للشيخة فاطمة والشيخة سبيجة..
موزة وهي مستغربة: زين يمة انا بروح وياكم قطوني الكلية و..
قطعتها فاطمة: خلي السايق الثاني يوصـلج.. ويا ابوج وهو رايح الشركة..
موزة طالعت ابوها: من بعد اذنك يبا..
حارب وهو يطوي الجريدة:.. روحي يبا لبسي انطرج في السيارة..
قام حارب من مكانه من بعد ما رمى نظرة خاطفة عابرة الى فاطمة خلت من قلبها يتقلب من الحب الشديد له.. اللي على مر السنين انقلب الى اشبه بالجمرة اللي ما زالت تتقد بحرارتها.. لا هو يقدر ينسى الماضي.. ولا هي تقدر... وصعبه حياتهم صارت وطريقة عيشهم بعد..
---------------------------
يا دور نور المتوترة في القاء فقرتها.. عن فضل الأم في حياتها.. وفضل العايلة على الانسان الطبيعي.. وقفت عند امها الي كانت متغيرة الوانها الا انها بعدها تبتسم بالطريقة الجميـلة اللي بالعادة تحملها في ويهها..
نور وهي خايفة: ماما خايفة مابي اقدم..
الجازي:.. وتحرمينهم من ويهج الجميل وفستانج اللي تعبتي وانتي تسوينه عشان هاليوم؟؟ شوفي ديكورج بس.. وزاويتج الحلوة.. روحي يا حبيبتي والله يوفجج بينهم..
نور وهي تتدلع:.. اخاف اخطأ في كلمة..
الجازي:.. حتى لو خطأتي.. استغلي خطـاج باحسن طريقة.. روحي حبيبتي والله معاج..
توها بتمشي عن امها التفتت لها مرة ثانية :.. احبج ماما..
باست امها على خدها وراحت.. وهالشي مزق قلبها اكثـر من الحسرة على بنتها.. وعلى حياتها اللي بتعيشها في هالزمن الطويـل.. بتمرين في سنوات من عمرج يا نور الله العالم ان جان بتواجد فيها ولا لاء.. بتمرين في مشاكل ومواققف اصعب من الوقوف جدام الناس والتكلم.. ياليت يكون وياج احد يقدر يشجعج عليها...
ووقفت نور.. والقت كلمتها اول الشي بتوتر.. ولكن يوم شافت امها تأشر لها بالتوفيج تشجعت وابتسمت وبان التقويم الحديدي على ظروسـها.. وكلمت الفقرة بنجاح باهر ونشاط فعال... والجازي اللي كانت واقفة وهي مفتخرة في بنتها وتصرفاتها الناضجة حست لقرب حميم منها والتفتت الا ولقته زوجها يغلفها بنظرات الحيـرة والزعل منها.. فما قدرت الا انها تبتسم في ويهها بحنية تحاول انها تذوب من زعله عليها.. لكنه هز راسه والتفت الى نور وأشر لها وخلاها تضحك في وسط كلمتها.. لمن كملت وصفقوا لها بارتياح واعجاب ظاهر..
وقفوا الناس لان الاحتفال انتهى والكل كان يمشي عشان يطلع من المكان.. الا الجازي اللي ظلت قاعدة مكانها ويا زوجها
علي وهو مستـغرب:.. وينج اليوم؟
الجازي وهي تيود على يده وتشد: مب الحين.. خلنا نروح لصالة الاستقبال.. وفي البيت باقول لك..
هز علي راسه لانه يعرف ان ورى الجازي شي كبيـر.. وحاول انه يكون هادئ.. لكن لمن شي يتعلق بمحبوبته وصديقته ورفيقة دربه ما يقدر يكون هادئ.. حتى ان تحركاته كانت متوترة وغريبة وشديدة الانفعال بعض الشي..
لمن طلعوا من المدرسة ونور ما سكتت من الفرحة وهي تعبر عن براعتها في الكلام وشلون انها استرسلت بالكلام من غير ما تحس بالتوتر واوعزت هالقدرة الى تواجد امها وابوها وياها.. لكن علي كان باله في مكان ثاني.. وما حس لارض الواقع الا يوم مسكت يده يد الجازي بابتسامتها الرقيقة الجميـلة..ومشوا الثلاثة الى اقرب تاكسي عشان يقطهم لمنطقـة مطعمهم..

يتبع

-------------------------
في جلسة التصـوير كان كايـد خبيـر في تعامله مع العارضات اللي كانو فوظويات بعض الشي.. رتب وضعياتهم مثل ما يبي وصور الصور اللي اهو يحتـاجها.. وبهدوء كبيـر تعامل في الامور ويمكن بشوية من الخجل والارتباك لانه مو خبيـر في التخالط مع الناس.. وكانو العارضات الجميلات لعوبات بعض الشي الا انه ما اعارهم اي اهتـمام.. كالعادة سوى اللي عليه وطلع من المكان من بعد ما تلقى الشـكر.. واهتم مساعده باتريك في ترتيب الصور وتنقيـتهم.. ودخل الى مكتبه الصغـير وين ما كانت اغراضه التصويرية موجودة..
اليوم الشعور غريب اللي يمر فيه.. من شاف البنت وهو مو قادر يشيلها من باله.. حس انها قريبة منه بصورة فظيعة.. مع انه لأول مرة يشوفها..
سند راسه بيدينه وهو يفكر فيها.. جميلـة.. وحلـوة.. وفوق هذا الشقاوة والغرور كانو ماليين ويهها.. حتى انها ما التفتت يوم طلبت منها ارفيجتها تلتفت..
كايد وهو يزفر: مو وقته احب.. ومو محتاج انغرم او انعجب في احد... مو وقته يا كايد..
ودخل عليـه محمد بسرعه وسكر الباب وتسند من وراه... مسكر عيونه وكانه طفح به الكيـل.. وكايد يناظره بصورة غريبة.. مع ان محمد صاحب هالمجلة ومؤسسة العرض الا انه ارفيج كايد الروح بالروح في هالغربة المستميـتة..
محمد وهو يفج ربطة العنق الانيقة: خلاص.. ما ع دت اتحمل.. ما عدت اتحمل يا كايد ما عدت اتحمل... صبح ريوق ويا ويه خيل.. وظهر تدشين محل يديد.. والعصر مؤتمر.. والليل عشا من سبعة اطباق.. وبآخر الليل تدشين نايت كلاب يديد او عرض ازياء عارضته يتبعون.. وفوق هذا اجتماعات مجلس الادارة.. والمقالات.. والغلاف.. و .. و ... و,,,, (قعد على الكرسي وانكسرت ملامحه الجميـلة) ما عدت اتحمل..i have had it.. I can't go on ماقدر كايد.. احس اني اختنق
قام كايد من مكانه ووقف عند كاونتر الماي:.. اشرب لك شي وارتاح..
قام محمد من مكانه وتخصـر بطوله الفارع: مابي اشرب شي يا كايد.. لاعت جبدي.. الحياة مملة بالنسبة لي.. نفس الروتين وكل يوم نفس الشي..
طالع كايد شوي وهو يتهفهف وحس انه انفجر في ويهه وحط فيه الحرة من غير ماله ذنب.. يمكن كايد يمر بظروف العن من ظروف محمد...
راح محمد عند كايد وحط يده على جتفه: I'm sorry buddy حطيت حرتي كلها فيك..
كايد وهو يبتسم: لا ما عليك.. what's the friends for? انت بس استرخي ولا تعصب نفسك اكثر من جذي.. بتييك القرحة..
محمد بسخرية: ليش اهي ما ياتني؟؟؟
كايد: هههههههههههههههه .. هدي اعصابك.. واقعد واسترخي شوي..
محمد وهو ماد يده على الطاولة: ماقدر.. الليلة عمتي عندها ديفيليه.. وابوي وبنتها بعد بيكونون هناك..
كايد وهو مستغربب: صج والله؟؟ الساعة جم؟
محمد وهو يطالع ساعته: مادري يمكن الساعة عشر.. شعندك انت الحين؟؟
كايد: الحين عندي تصوير في عرض ازياء.. في ستاتن ايلاند... وعندي بعده تصوير في هني منهاتن... انت فاظي الساعة ست؟؟
محمد: حتى لو مو فاظي بفظي روحي .. شرايك؟؟ نتلاقي في الوست بوينت.. ونروح اي محل كوفي شوب ونقعد هناك شوي.. احس اني متعب صراحة..
كايد:chill man الويكاند بعد يومين..
محمد وهو يسوي ربطة العنق:.. انت تشوفها يومين.. انا اشوفها سنتين.. يالله.. سي يو لايتر..
كايد: take care


يتبع

------------------------------------
هذا هو الوقت.. مثل كل يوم.. اللي فيه حور توققف ويا نسيم تنتظر في قلبها طلوع خلف من محاظرته.. يدرسون في نفس الجامعة ولكن هو يدرس هندسة التصميم.. وهي تدرس فنون.. ومثل كل مرة لازم توقف وتوققف وياها نسيم اللي تتحندى وتتحرطم على هالوقفة..
نسيم: this is too much 7oor لج في الريال سالفة روحي وكلمـيه .. لا توقفينا كل يوم بهالطريقة .. it's embarrassing محرج..
حـور وهي تترقب طلعة خلف من محاظرته باي وقت وميتة من البرد:.. سكتي.. انتي شعرفج عن الانحراج.. جوفي اللي حاطته في خشمج وقنعي..
نسيم وهي توقف في ويه حور بنظرات احتقار: .. الحين بتعلقين ها؟؟ من الصبح للحين.. واو عجيب حلو ولايق عليج.. والحين بتتطنزين.. انتي اسوأ انواع الاصدقاء..
حور: يا يا .. تكلمي عن نفسج قبل.. ما تنتظرين ويا ارفيجـتج انها تشوف فارس احلامها..
نسيم: فارس الاحلام هذا صار مصدر ملل.. باول يوم كان فن.. وثاني يوم كان فن... وثالث يوم بعد كان فن.. لكن الحين بعد مرور ستة اشهر صار ممل.. وانحراف في الشخصية..
حور وهي تحس بكلام نسيم اللاذع... لانه صح وصابها نوع من الخيبة في الأمل والحزن وقعدت على الكرسي:.. شاسوي ... ما فيني اروح له واكلمه.. وهو كل ما يشوفني يبتسم ويمشي.. يعني وين عزة النفسـ اللي لازم احملها في قلبي... كل شي يتبخر؟؟
نسيم وهي تقعد يمها: انتي عبالج اهو ما يفهم انج كل يوم توقفين هني مثل الصمنديقا لجمال طبيعة الله...؟؟؟ wake up sister يعرف انج معجبه فيه من جذي يسوي فيـج جذي..
حور وهي تحس بالانحراج: الحين احس روحي قطعة تفاهه.. يا الله.. (سحبت نفس قوي وقامت) خلاص.. ما عاد لي مكان هني.. بروح من محل ما ييت.. وخلف لازم اتخطاه.. اذا هو ما يالي. انا ما بيي له... وخلاص.. that is a final decision
نسيم وهي تشجعها: good.. that is a fine girl انتي الحين تتصرفين مثل بنت ممتازة.. وخلينا نمشي من هني لاني ما حس بمنخاري..
حور وهي تتشجع: اوكي خلينا نمشي..
خطوات وتخاذلت حور...
نسيم بظيج: شنو الحيييييييين؟؟؟
حور وهي تتراجع: شنو لو اليوم كان اهو اليوم..
نسيم بعصبية :اي يوم حور ؟؟؟
حور: اليوم اللي بيوقف ويكلمني فيه.. ومن بعدها .. بيكلمني مرة ثانية.,.. وثالثة,, ورابعة... ما تدرين يا نسيم.. يمكن اليوم اهو اليوم اللي بيتسجل في التاريخ
نسيم: من ستة اشهر .. كل يوم يمر .. يا حور اهو اليوم اللي يمكن يتسجل في التاريخ؟؟ شمعنه هاليوم يعني؟؟؟
حور وهي تعاتب نسيم: انتي صج انسانة تحب تقتل الآمال.. خلاص.. بنمشي..
نسيم: زين... حان الوقت اننا نتخطى هالمرحلة المراهقية..
ومشـت حور.. وهي ناسية جنطتها على الكرسي اللي كانو قاعدين فيه.. في نفس اللحظة اللي طلع فيها خلف من احد الصفوف في البناية الكبيـرة.. وتم يمشي وهو متمتع بالجو الشاعري الحالم.. وشاف حور ووياها ارفيجتها يتمشون.. اهو يعرف حور لانها كانت في صفوف الاعدادية للجامعة.. ولاحظ انها هدت جنطتها اللي كانت على الكرسي.. فحمل الجنطه ونادى على حور..
اول شي ما التفتت حور بعدين يوم ناداها للمرة الثانية التفتت.. وكانت الصدمة اللي اهي لطالما تمنتها..
خلف كان شاب اسمـر طويل شعره قصـير ودايما يلبس نوع من الطاقية على راسه.. وعيونه عسـلية واسعة ولامعة.. لحيـته شوي غامجة وتدل على نعومة رجولية.. وحور انعجبت فيه من المرة اللي وقف فيها وتم يشرح عن التصاميم الفيكتورية والغريغورية.. لكن اهي مافهمت ولا شي في هالموضوع.. بس فهمت شي واحد.. ان خلف هذا.. بيكون اهو سبب في دقات لقلبها..
لكن اللي ما تعرفه حور ان خلف خاطب وخطيبته تنتظره في بلاده انه يكمل ويرجع.. ومن يدري.. يمكن وحد ة من الثنتين تنتظرها صدمة من صدمات العمر الطويل..
حور وهي تلتفت ويدها بشعرها:.. اهلين خلف
خلف: هلا فيج.. جنتطج هذي؟؟
طالعتها حور وفجت عيونها.. هالجنطه اليوم صارت السبب في تدوين هاليوم في تاريخ حياتها: صج غبية.. نسيت اني نسيتها على الكرسي..
خلف وهو يبتسم: لا ما عليج شر.. جل من لا ينسى بهالدنيا.. على الأقل انتي احسن مني.. انا مرة نسيت روحي في مكان ههههههههههههههه
نسيم حست للنكته بايخة لكن حور ضحكت وهي تجبر نفسها على الضحك..
خلف وهو يستأذن:... عن اذنكم.. اشوفكم على خير..
حور وهي تحس بالاحباط:... وانت بخير وسلامة...
توها بيلتفت عنهم الا رجع مرة ثانية:.. بمر عليج في مرسم كالاهان.. ابيج تسوين لي خدمة اذا ما عليج امر..
حور وهي مو مصدقة حظها اليوم:.. مر..سم.. كالاهان... شدراك اني هناك؟
خلف: وياج عيد الزهري.. واهو رفيـجي.. خبرني وانا قلت من غير حور تقدر تلبي لي هالخدمة..
حور وهي فرحانة من قلب:.. اكيد اكيد.. اي وقت.. وانا بكون تحت امرك..
خلف وهو منغمر من طيبة حور اللي فهمها بطريقة اخوية: الله يخليج.. يالله اشوفكم على خير..
ومشى خلف.. وحور ظلت واقفة مكانها وهي مو مصدقة.. ونسيم بعد فاجة حلجها وهي ما تصدق..
حور تطالع نسيم وهي فرحانة: تعرفين يعني شنو هذا؟؟؟
نسيم: اليوم اهواليوم؟؟؟؟؟
حور وهي تهز راسها بالايجاب والفرحة تغمرها: اليوم اهو اليوم... This is it
This is it, This is it, this is it يوووووووووووووووووووووووووووهاهاهاهاهاهاي..
وظلوا الثنتين مثل الميانيين يتنقزون بالحرم الجامعي والكل يطالعهم ويضحك عليهم.. وظلوا في طول دربهم يتكلمون عن المستقبل.. ووصلت سوالفهم الى يوم زواج حور من خلف.. لاي درجة يقدر توصل مخيـلة البنات الجامحة.. وفي طول درببهم اللي اخذ حوالي ساعتين من الوقت.. كانوا يمشون على طول درب النهر الى المطعم اللي يديره ابو حور.. وفي نفس الدربب كان يمشي كايد ووياه محمد.. وبدور في المطعم تحل واجباتها وتساعد سرور.. والجازي وعلي ونور بعد كانو هناك.. والمطعم في اشد حالاته من المتواجدين..
كانت حور ويا نسيم ورى ومحمد وكايد جدام وكل حوار مختلف عن الثاني..
محمد: احلم باشياء اكبر من جذي يا كايد.. احلم اني اكون شخص ثاني.. اسافر الاماكن اللي ابيها واسوي اللاشياء الي ابيها.. تصدق اني حتى ما اعرف العب بته؟؟ بته يا كايد.. بته عادية من غير قمار ولا شي.. ماعرف حتى شعور الانسان اللي ينط من فوق.. خاطري اسبح وخاطري اسوي اللي ابيه. كله من الممنوعات..
كايد وهو حاط يدينه في مخابيه ويضحك عليه:.. اشفيك.. ليش مصعب الوضع على نفسك.. خلك مسترخي وكل شي بيمر عليك بخير..
محمد وهو يمشي وهو مجابل كايد: يعني انا من المفروض اني اميـر؟؟ صح ولا لاء؟؟ ما احس اني اعيش الظروف اللي يعيشها اي امير..
كايد: انت اميـر في ديرتك مب هني.. هاي الديرة ما تفرق بين امير ولا فقير..
محمد: انت مينون.. اميـركا اسمها الثاني اهو التعصب العرقي والطبقي.. بس ما يبين عليهم.. في التلفزيون يسوون روحهم من احسن الناس.. لكن في قلبوهم.. العفن نابت يا حبيبي.. (يمشي وهو يحل الربطة) خاطري.. خاطري احب.. خاطري احب بنت يا كايد... احبها من كل اعماق قلبي.. وخاطري تكون... انسانة بسيطة.. تحملني في عالم البساطة...
كايد: حب انزين.. عندك بنات الدنيا كلهم.. بس ...
محمد وهو يحس بالاحباط: بس انا حاجزيلي وحدة.. وهالوحدة اهي اللي بتكون حبيبتي.. وللاسف الشديد اهي مو بسيطة.. ولا لها بالبسـاطة..
كايد وهو يحط يده على جتف محمد/: ما عليه يا محمد.. لا تصعب الامور على نفسك.. كل شي قسمة ونصيب.. وما يصيب الانسان اللي الله كتبه عليه..
يبتسم محمد في ويه كايد...: صدقت والله في هالشي.. ونعم بالله..
نسيم كانت تتنقز بالشارع وحور تضحك عليها:.. ماصدق.. ماصدق ان وحدة منا صارت محظوظة وبدى الروليت يشتغل في صالحها..
حور: لكن الروليت مو دايما يكون في صالح الواحد.. ساعات يطخ الراس برصاصة..
نسيم: بس انتي خلاص يا حور.. تجاوزتي الطخة.. (تصارخ) you the among the living now girl..
حور وهي تسكتها: سكتي بس فظحتيـنا..
نسيم وهي تضحك: مو مصدقة والله يا حور.. انتي خلاص. .لقيتي اللي تتمنينه..
حور وهي تهدي من نسيم ونفسها:.. خلينا الحين لا نستعيل نفسنه.. للحين ما صار شي..
نسيم وهي مستغربة لا بل مندهشة: شنو ما صار شي.. انتي اليوم شفتيه.. وكلمج.. ولاااا بييج المرسم .. تسوين له خدمة.. ومن خدمة بتصيرون ربع وبعدين ما بيقدر يقاوم جمالج الآخاذ..
التفتت محمد الى صوت البنات اللي يتكلمون.. والتفتت اكثر شي لان الكلام كان عربي وتم يلاحظ بنتين مزعجتين في الدرب:.. شوف شوف هالبنتين.. عافسين السكة بزعيجـهم..
كايد وهو يلتفت بسرعة ويرجع مرة ثانية الى جدام.. ورد يلتفت مرة ثانية لكن هالمرة باندهاش.. لانها البنت اللي شافها اليوم في المترو.. وتم واقف مكانه لحد ما طافوا البنات من يمه ونسيم انتبهت له لانه نفس الشخص اللي شافته اليوم.. وابتسمت له بطريقة لعوبه لكن اهو كان يطالع حور اللي ما عطته حتى ويه.. ومرت من صوبه وكانه شيرة..
محمد وهو يهز راسه: بنات اخر زمن.. جوف اميـركا الحلوة شتسوي في بناتنا... الحمد لله والشكر...
اما كايد فكان واقف يطالع البنات وين ببيروحون ونسيم كل شوي تلتفت له وهي تضحك.. علبالها واقف يطالعها..
نسيم بعيله: حور التفتي شوفي الهاندسم اللي كان اليوم في المترو؟؟
التفتت حور وهي مستغربة: اي واحد؟؟
نسيم : اللي لابس جاكيت جلدي..
طالعت حور باتجاه كايد وحست لنظراته القوية تجاههم لكنها تجاهلته: so??
نسيم وهي تضحك: صج ان اليوم يوم تاريخي علينا.. اكيد الله راسم لنا شي اليوم..
حور: انتي اصلا مينونة.. يالله سرعي خلينا نروح داخل المطعم..
سرعوا الثنتين وكايد على طول مشى محمد وياه الى نفس الكافيه..
محمد معترض/: مو لازم هالكافيه يا كايد.. خلنا نروح الثاني شكله مزحوم..
كايد بصوت حماسي لاول مرة يحس فيه بنفسه: ما تفهم محمد.. اليوم هالبنية للمرة الثانية اشوفها..
محمد : اي وحدة؟؟ المينونةولا ؟؟
كايد: الثانية.. اول ما شفتها اليوم (وهو يمشي صوب الكافيه) مادري شلون.. حسيت ان لي صله بها..
محمد وهو مستغرب من كايد: شفيك كايد؟؟ لا يكون بس صابك مس..
كايد وهو يمشي محمد وياه: ما عليك انت الحين.. خلنا ندخل ونشوفها.. بليز.. خمس دقايق بس..
محمد وهو يطالع ساعة الروليكس اللي عليه: اوكي بس ما نطول.. لازم اكون الساعة ثمان في البيت عشان اجهز ونمر على فندق عمتي وبنتها..
يا ترى.. كايد بيتبع حور؟؟
ومن بعد ما يتبعها شبصير؟؟؟
بيتلاقى مع الجزء الضائع من اهله..
والا كل الامور بتظل عالقة في دهاليز الغربة..
يتلاقون ويتعارفون ويتزاملون يمكن.. لكن بيعرفون بعض؟؟؟

والله قصة يبان عليها غريييبة بس حلووووة

اتوقع انو حور مارح يعجبها محمد

نصبر و نشوووووف ^_^

شكرا غلااااوي عالقصة

عساكي عالقوة

بانتظار التكملة

العفو الملاك النائم

والله يقويك

وشاكره لك مرورك

دمتِ بود

غاليتي
(غلا)
روايه رائعه بحق
ننتظر التكمله
بشــــــــوق
وتستحق التثبيت
/
\
لك الورد

الروعهـ مرورك ريانة العود

ومشكورهـ على التثبيت

منورهـ الموضوع بمرورك

دمتِ بود

والله تستاااهل التثبيييييت

^_^