يمّه أحبه فديت أبوه قبل أمه

يمّه عليه إن زعل ... واذا رضى يمّه

يمّه ذبحني غلاه ... وشلّ وجداني

يمّه غرامه طريقي ... ولازم اتمّه

شيٍ من الله على غفلة تغَّشَاني ...!!

اشهق على ضحكته واشفق على ضمّه

واموت منه إن جفى ... وإن جاني احياني

إن كان درب الشقى يمر من يمّه ...!!

والله لكمّل شقاه " إن الله احياني "

اقول ياسيدي ... ويقول ياعمّة ...!

كلٍ ذبحه الوله في عشقة الثاني

اشتاق طعم الغدير اللي وسط فمّه

مقدر اخبّي عليه ... اكتب ويقراني

قمت اشتكي للغلا ... واصيح واخمّه

ياشين بلوى الهوى ... الله لا يبلا ني

يقول لي بالهوى مذهب ولي ذمّة

واقول بصرك ... ولكن لا تعداني

ابي طريقك يصير لوجهتي يِمَّة

ومنين يممت وجهك غصب تلقاني

يزمني بالهوى ... زمّة ورى زمّة

قطّع وريدة وخاطه وسط شرياني

مبطي اذا خفت صحت وقلت " يايمّه "

والحين اذا خفت صحت وقلت " ياحصاني "

لا واهني من قرب منه ... ومن شمّه

ماكن ربي خلقه الا على شاني ...!!

جيته وكلي من الاشواق ملتمّة

امشي من الصبح لين ان عشقه امساني

ياحلو لوعة شقاه ... ويا حلو سمّه

والله ياهو بالهوى " من جد وراني "

ادمى عيوني ... وحنى يديني بدمّه

وعلى طريق الوله اقفى وخلاني

يمّه احبّه ... فديت ابوه قبل امّه ...!

يهزني هز ريح ... وزلزل اركاني

وش فيه اذا البنت تعشق...؟! .. الهوى قمّة

خليني اعشق قبل ما تابس اغصاني

يهمني حيل ... وادري فيني اهمّه

حتى اسألي روجي الوردي ... وفستاني