صديق الروح

هذي قصة قريتها من كم إسبوع..
طبعا إنتشرت هالقصة بين البنات في الكلية وصارنا نتحدى بعض من تقدر تقراها وماتصيح منها..
المهم صار التحدي هالمرة علي أنا فقلت هاتوها وأنا أبوها << وش أبوها أنتي بعد قولي أمها..
عاد يوم قريتها الدموع أربع أربع وش أربع أربع إلا ثمان ثمان..
وكرتون المناديل اللي جنبي خلص..
والكيبورد إمتلا دموع ..
حتى إختي يوم دخلت علي قالت عسى ماشر وش عندك تصيحين؟؟
<< وش رايك تقولين لهم قصة حياتك أحسن :p
طبعا راح أنزلها لكم على أجزاء مو دفعة وحدة..
المهم أخليكم مع القصة تراها رووووعة ولا أوصيكم خلوا مناديلكم حولكم..
يوووووه صح نسيت أقول لكم ترا القصة حقيقية..

*·~-.¸¸,.-~*صديق الروح*·~-.¸¸,.-~*
الجزء الاول
الصداقه من اقوى العلاقات الانسانيه,علاقه يميزها انها تجمع عدة مشاعر واحاسيس في اطارها مثل المحبه ،التضحيه وغيرها.
يمكن اغلبنا او اقدر اقول يمكن كلنا حصلت له مواقف مع اصدقاءه منها الحلو ومنها المر,منها اللي تقوي العلاقه ومنها اللي تنهيها.
قصتي تتكلم عن هالموضوع,تقدرون تقولون انها تحمل مشاعر اكثر منها احداث لكني قررت بعد تفكير طويل اني اعرضها للناس عشان يستفيدون منها.
احنا كمجتمع للرجال حدود الصداقه غالبا معروفه عندنا واغلبها تكون للوناسه والمصلحه,انا مااقول الكل بس اكثرها لكن اللي صار معي شي ثاني وهاذي قصتي...
في عام1408هـ ,كنا تونا منتقلين لمدينه الرياض والدراسه بدت من اسبوعين تقريباكنت في سنه رابعه ابتدائي دخلت فصلي الجديد وسوا الاستاذ تعارف بسيط بيني وبين الطلاب,لما جا وقت الراحه طلع الجميع الا انا ,دخل ولد اسمراني شعره حوسه واسنانه الاربع الاماميه اللي متكسر واللي طايح,مشمر اكمامه ووجهه كله مخوش وحالته لله الا انه رغم كل هالبلاوي فيه شيء يخليها مو باينه!!..
قعد يحوس في شنطته ساعه وكل دقيقه يطلع خرابيط وكل شوي يرفع عينه عندي واخيراطلع منها نبيطه,وقبل لا يطلع التفت علي وكان من النوع الي كنه بينطحك وهو يطالع، منزل راسه شوي ومعبس طول الوقت بس كانت بريئه اكثر من ان تكون مرعبه!! وقال بلدغه طفوليه سببها واضح وهو اسنانه اللي حالتها صعبه:انت الحين ليش جالس لحالك؟..كانت هاذي اول جمله سمعتها من الانسان اللي صار بعد كذا أغلى البشر على قلبي, كان معروف عني اني انطوائي ومنعزل هاذي طبيعتي حتى اني اتوتر لما يكلمني احد ما اعرفه رديت عليه:بس كذا انا ما ابي اطلع وبعدين انا ما اعرف احد هنا...وبنفس النظرات اللي والله اعلم انها كانت عاده عنده...تعال معي وانا اعرفك على نص اللي فالمدرسه... كان يجرني من يدي وانا اسحبهابخوف...لا لا انا كذا مرتاح قلت لك ما ابي اطلع...لكن الولد اصر لين طلعني معه بالغصب,وزي ما قال عرفني على نص المدرسه تقريبا لكن تبون الصدق حسيت اني تعلقت فيه هو!!يمكن عشان شخصيته عكسي تماما اجتماعي,خفيف دم والكل يحبه ويحاول يتقرب منه صحيح انه كان شيطاني ومشاغب لكنه ماكان يتعدى على احد!! حسيت اني مبهور بشخصيته ورغم انه ذكي جداً الا انه فالدراسه ما كان بالحيل بس كان يعرف يمشي عمره من يومه صغير.
وعلى كثر الاولاد اللي يعرفهم الا انه بعد تعلق فيني فوق ما تتصورون صرنا ما نتفارق ابد ولا يشوفون واحد فينا بدون الثاني.
مرت السنوات وصداقتي تزداد قوتها مع خالد..مرت علينا سنين الطفوله والمراهقه وحنا سوى ودخلنا الجامعه وتخرجنا وحنا ما عمرنا تفارقنا,حتى في السفر ما اذكر ان واحد سافر بدون الثاني الا اذا كانت السفره مع الاهل,اغلب الناس اللي يعرفونا يحاولون ياخذونا قدوه وكثير منهم يضربون المثل في صداقتنا,يمكن تتسآءلون وش سر هالصداقه العميقه؟!! شي واحد كنا نطبقه بدون ما نحس من يوم حنا صغار,شي عجزت اغلب الناس انها تفهمه في تعاملها مع بعض، وهو ان كل واحد فينا كان متقبل الثاني بكل ما فيه من العيوب ولا عمر واحد فينا حاول يغير الثاني ويمشيه على طريقته برغم الأختلاف الكبير بينا..
خالد كان فيلسوف بالفطره وبسبب علاقاته الكثيره، وكنت اتعلم منه كثير,لما اسأله كيف يقدر يجمع كل هالناس حوله كان يقول كلمات بسيطه لكن تركت فيني اثر كبير كان يقول:اسمع يابندر الناس لها مشاكلها وكل واحد فهالدنيا صدقني منشغل في نفسه ولا احد تهمه مشاكلك فاذا تبي الناس يحبونك انسى نفسك وفكر فيهم وكيف تساعدهم في حياتهم بقد ماتقدر.
قصتي الاساسيه اللي ابيها توصلكم مو في كيفيه صداقتنا لاني مهما شرحت ماراح اقدر اوصلكم مدى عمقها لكن الحدث اللي قلب حياتي ولا أظن ترجع زي ما كانت.
في يوم اربعاء جاني خالد للاستراحه اللي نجتمع فيها مع الشباب والفرحه مبينه في عيونه وسحبني من بينهم...تعال بندر ابيك في كلمة راس...لما صرنا برى...عندي لك مفاجأة ...وابتسم,انا ذاك الوقت اللي يشوف وجهي يقول خبل اناظر فيه وفاتح فمي...كمل كلامه..ابشرك
<< تبون تعرفون وش بشره به؟؟
تابعونا الحلقة القادمة
<< محسبة نفسها مسلسل
الله الله بالردود السنعة..

من بدايه الحلقه الجايه
وانا مسنتر عند التلفزيون هههههههههه
قصدي عند موضوعك تكفين لاتطولين

هلا أخوي توتي روما
تصدق فيه محل حولنا إسمه توتي مانجا ورا ماتغير إسمك لها الإسم؟<<أقول يازيني ساكته بس :p
لا إن شاء الله ماراح أطول
مشكور على المرور<< ياهوه ياسجع << وش سجعه الله يرجك أنتي بعد << أقول خلاص
لا عدمناك أخوي :)