يوميات طرزان لاتفوتكم 60 حلقه ^_^

السلام عليكم ورحمة الله وبركاته
بصراحه جتني فكره اني اخلي لي صفحه في هالمنتدى اكتب فيها ذكرياتي وفضايحي :22:

سؤال قبل ماابدى تبغون ذكرياتي بلغة فصحه والا العاميه واريحكم ^_^
طيب بابدى باول ذكرياتي
كنت صغير عمري تقريبا خمس سنين مابعد درست
بالاول الناس يعرفون حتى جيرانهم الي على بعد 500 متر
الحين ماتعرف حتى جاركم الي بابه مقابل بابكم
المهم
بالعاده في الليل نورح انا واخوي الي اكبر مني بـثلاث سنين نلعب مع عيال جيرانا
وكان عندهم بقاله تطل على الشارع الثاني الي خلف بيتنا وكان لها باب داخلي يفتح على حوش جيرانا

مره في بيتهم ومره في بيتنا وعلى هالعاده
وفي يوم من الايام وحنا نلعب في حوشهم ناظرت لباب البقاله فاشتهيت ببسي>>مدمن ببسي وهو بزر
من جد اكلمكم اشتهيت لي ببسي
لكن المشكله احنا صرنا في آخر الليل والبقاله بالاول تسكر الساعه 11 على اقصى حد
ياولد وش اسوي
ماعرفت ايش اسوي
جلسنا نلعب كورة وبعد مارحنا للبيت وانا افكر في البقاله ماادري وش اسوي
جلست اتقلب على السرير ماجاني نوم ابي ببسي لازم اشرب ببسي
اذن الفجر وانا ماجاني نوم
صلينا الفجر ورجعنا وانا على هالحاله ماافكر الا في الببسي >> والله لو انا مدمن هروين

المهم صارت الساعه 6 فكرت قلت ياولد هم الحين نايمين والبقاله ماتفتح الا الساعه 9 صبح من وين لي صبر على هالمده
تداولت علي الافكار من جهه لا اعلم الى اين انتهيت ولكن في النهاية توصلت الى حل
تذكر ان باب البقاله الي يفتح على الحوش مايقفلونه بقفل هههههههههه فهنى بدى العقل الباطني يتحرك عندي وبديت اخطط كيف تتم عملية السطو >> بيسطو على بنك

جهزت عدتي واخذت السلم من المستودع وحطيته على جدارنا وطلعت ناظرت يمين يسار الحوش فاضي مافيه احد والعالم كلهم نايمين
نزلت في حوشهم
وبديت امشي بهدوء وفتحت الباب ودخلت البقاله
ههههههههههههههه ماتصدقون كيف كان احساسي وانا جالس في البقاله لوحدي
اخذت يمكن ساعه وانا العب في البقاله
مسوي كاني محاسب في البقاله
ماني مصدق الي انا فيه
ثلاجه مليانه من جميع البساكيت
حتى اذكر ايام توكس يوم كان بريال ونص ههههههههههههه والله ايام فله
حصلت لي كيس طحين الي مكتوب عليه ابو ظبي فاضي
ومسكته ولا شعوريا على كل رف امر من عنده آخذ منه عينه واحطه في الكيس
ههههههههههه طبعا ماقصرت في الاعاب وخاصه هذيك حقت العسكري الي يجي فيها صافره ومسدس وكلبشات
وبعد ماأخذت مما لذ وطاب طلعت من البقاله ورجعت كل شي مكانه >> محترف
المشكله الكيس اكبر مني وجالس اسحبه باقوى شي عندي
ناظرت للجدار حصلته مرتفع مره وشلون اطلع الكيس
جتني فكره قلت باطلع مع باب الشارع واروح مع الجهه الثانيه
وطلعت مع باب الشارع والحمدلله ربي لطف ماانكشفت
ومشيت في الشارع وانا اسحب الغنائم وكاني ماسويت شي ماهمني احد خلاص فرحان ههههههههههههههههههه
ودخلت البيت ومااحد شافني
وجلست طول يومي مواصل مانمت وانا جالس فوق السطح مع الغنائم
وفجأه ماحسيت الا الي حاط ايده على كتفي ويقول لي وش هذا
طلع اخوي الي اكبر مني
طبعا انا خفت وارتبكت ماادري وش اقول له
قال يالحرامي كيف فكرت كذا
سكت ماقلت شي خايف يروح يعلم علي
قال لي اسمع ماتبغاني اعلم صح
قلت له ايوه
قال طيب بشرط>>> شوفوا النذاله
قلت ايش
قال لي ابيط تعطيني كل هذولي ومالك انت الا الربع
والا ترا والله لاروح لابوي الحين واعلمه>> نذل من جد
انا خفت بصراحه وجلست اقول له لا تكفى لاتعلمه حتى اني فكرت اني اتنازل له عن كل شي
هههههههههههههه خواف
جا اليوم الثاني وانا كل شوي داخل على اهلي بعلبة ببسي وبسكوت تويكس مااحد قدي
سالتني امي من وين لك كل هالفلوس من الي معطيك
ارتبكت والعب عليها مسكينه على نياتها
قلت لها مرت السياره الي توصل بضاعه للبقالات وطاح منها كرتون ببسي وكرتون تويكس وكم من كرتون
قالت لي تتكلم جد
هههههههههههه تعرفون البزران اذا كذبوا ماهمهم يحلفون عادي
واجلس احلف لها اني صادق
صدقت امي
يوم صدقت انا فرحت
ويجي العصر كان ابوي بالعاده يطلع من العصر ومايرجع الا بالليل
وفجأه دخل ابوي
ماصدقت كان في يدي بساكيت وببسي
انصدمت بصراحه
ناظر فيني ابوي مو مصدق من وين لي الي في يدي
يعني مو معقوله كل هالبساكيت وش السالفه
جاني وقال لي محمد وش هذي
سكت ماعرفت اتكلم
عارف ان تصريفتي على امي ماراح تمشي على ابوي
ههههههههههه سحبني مع شعري واقرب جدار طرااااااااااااااخ
قلت له سرقتهم من البقاله
هههههههههههههههههه شوفوا ابوي عليه نذاله
قال لي يالله قدامي الحين ترجعهم للبقاله
ابوي تكفى شف غيرها قال لي مافيه تستاهل وان شاء الله يمسكك ويتصل على الشرطه
جلست ابكي عند ابوي ماعطاني وجه
قلت امري لله
ركب سيارته وجيت انا ابي اركب معه
قال لي انزل انزل ياللوح تمشي قدامي على رجولك
نزلت ومشيت للبقاله >> المصيبه اني امشي وانا اشرب الببسي واكل بسكوت كانه ماصار شي
دخلت البقاله قلت للعامل عندك حفايض بامبرز
قال ايه حسيت وقتها اني توهقت
قال لي اي حجم تبغى
هههههههههه طبعا انا مااعرف ان الحفايظ لها احجام
قلت له يووووه نسيت بروح اسال اهلي وبارجع لك وتركت الببسي والبساكيت على الطاوله عنده وطلعت
وابوي جالس ينتظرني برا
وماعرف اني لعبت عليه ^_^

وتوته توته انتهت الحتوته



انتظروني في الحلقه القادمه

ههههههههههه
الله يرجك طرزان
وبانتظار الحلقه الثانيه من يومياتك00

مشكوره كثير اختي غلا لمرورك الكريم
ويكفي ردك لابدى بالحلقة الثانيه >> متحمس ^_^

تعرفون كلكم ان صلاة العصر مافيه بعدها سنة راتبه
المهم اذن المؤذن لصلاة العصر
الوالد الله يطول بعمره بالعاده قبل الاذان يكون في المسجد
دخل انا المسجد على الاقامه
وجيت في يمين الصف في الصف الاول
بالعاده اكون في الجهه اليسرى >> المركاز حق عيال الحاره هههههههههههه
خلصنا الصلاة وجلس الشيخ يتحدث
قمت انا ابي اطلع وتفاجأت ان الوالد يناظر لي بنظرات حاره وشديده
انتابني قشعريره في جسدي
على طول دايركت وقفت في الصف الثاني وتسننت هههههههههههه
على بالي يوم يناظر فيني انه ينتظرني اتسنن
فقلت خلني اتسنن واجلس ازين في صلاة اطيل الركوع والسجود كاني في صلاة القيام ^_^
والله يغفر الذنب ماكانت والله لله كانت علشان ابوي
ويوم رجعت للبيت دخلت فرحان عارف ان ابوي بيجي وبيجلس يمدح فيني
لكن تفاجأت ان ابوي اول مادخل قام يصارخ وين محمد ؟
خفت بغيت اتكسر مكاني
بغى يجيني مثل الكراتين لوني مثل الثلج من الخوف
جاني ابوي وشالني مع ثوبي قلت ياسلام بيحضني ^_^
تفاجأت يده الثانيه تسحب شعري
قال لي عسى ماشر وش عنده الطنطاوي يتسنن بعد العصر
ماتكلمت مااقدر اتكلم انتظر بس الكف
قال لي ماتدري ان العصر مابعدها سنه
قلت يوووووووووه نسيت
وشوي جاني كف يمشي مليون قال هذا علشان ماتنسى مره ثانيه ^_^

وانتهت حلقتنا اليوم

تبغون الحلقه الثالثه هههههههههههههه
يالله اشوفكم على خير

هههههههههههههههههههههههههههه
مره ثانيه لاتسنن
هع
وفي انتظار الحلقه الثالثه<<ماتنعطى وجه :)

هههههههههههههه ابشري
بس متاكده تبغين الحلقه الثالثه والا لا؟؟